وسم

وقال: وحْشَاني وازَّيِّك وحَشَّاني بـ دلَال زِيِّك وقال زَيِّك ما فيش نِجمَات ما فيش صبَاحات.. بتفْتَح صِدرها الدفيان لوجد الروح ما فيش نرجِس ولا لُوتَس ولا بُولِس هيتسامر فى صُلب الدِّين مع محمد ولا حِملَان هتهرَب من كِمَاش الديب وقال: قادرَه؛ هواكي عجيب بيسرَق حاسِّتي التنهيد لآخر خطوتي.. عينيكي بيبْعَتني ويلْقَاني.. عاشق ممسُوس يحبِّك مُوت.. بصوت النصر والثورَه بريشة الدهشه والإعجاز.. يشِفِّك صُورَه فى قصيدَه.. حروفُها البهجه ملْكَاني وقال: صناره يا صبيَّه وعيوني غاب وفى بعادِك بافُوت مسجون على المنفَى عن الأوطان باتُوه أغراب باضِيع لا محل مـ الإعراب يضُخ وجودك الأنفاس فى دمِّي حياه اكون المبتدا والحال اكون الصَّلْب يتذلِّل؛ فصُوص من سُكَّري الشفاف رمَت روحُها.. فى مَيَّة نهرك الصافي بِرقصَه ودابت الأشواق. #هناءـالوصيف

يا شمس بالرِّجل اليمين خُشِّي الإوَض وعلى السرير اتمَطَّعي فِكِّي ضفايرِك للشتا وبلاش على الفَرْخ الطري من ده الحلال تتمنَّعي لو تطمَعي فـ لَحْمي خُدِيه وعلى المناشِر انشريه؛ مغسول بـ لِيفَه لكن تراوغِي و تعمِلِي فيها خلِيفَـه... بالمَكايد هتلَاقيني "أصمعي" #هناءـالوصيف

اِتخطَّى العُقده الواقفه لمنشارك دقدقها؛ تنِخ الحُفرَه اللي توقَّف سيرَك عدِّيها محطَّه عدِّيها.. وكمِّل ما تُقَفش على الشوك النافر وتعيَّط دم اتخطَّى الظن الضَّعف الناس كل الحراميَّه اللي بتسرَق فرْحك وبتدلق جواك الهم اتأمِّل في الجيّ طريقك ما تبصش ع الماضي يجِيبك زي الأرنب تتلفت لشمال ويمين فُرِّيرَه في سباق الجري لكنك.. وِسط الكُترَه غشيم بتخاف وتكِشّ لما الأنظار تترصد لك تخنِس في مكانك؛ تقلِب فار الهَمّ اللي متقَّل كتفك اِرمِيه بقرارك تبقَى خفيف تمشي على كِيف الكيف متغنْدَر الخطوه من الفيل زي الخطوه من الكُنغُر! ما تكُونش من الألعاب السَّهْلَه ما تكونش هوامش خليك متَن الأحداث؛ صعب وعاصي خليك الوقت الكافي مش بس مجرد مُهلَه. #هناءـالوصيف