رمضان كريم

يمكن بدأنا نشارك في الاستعداد لرمضان لما بقينا تلامذة في المدرسة الابتدائية، خاصة ان المدارس الابتدائية كانت أول المراحل التعليمية ودايما بتعمل الترابط بين جيران الحي اللي ما يعرفوش بعض، يعني يمكن قبل مرحلة المدرسة الطفل كان بيلعب على السلم او في مدخل البيت اللي عايش فيه ودائرة علاقاته ما بتكونش اكتر من البيتين اللي جنبه، لكن في المدرسة الابتدائية الموضوع بيوسع حبتين، بتلاقي بقى اغلب جيرانك في الشارع والشارع اللي وراك والشارع اللي قدامك وشوية شوارع حواليك من كل جانب. يمكن علاقاتك بتكون محدودة باللي بيقعد جنبك على نفس الدكة واتنين ثلاثة ارتاحتلهم لكن اديك بتتفرج على الباقي وبتعرف ناس تانية، وتكتشف ان في على الكوكب شوارع غير الشارع اللي انت بتشوفه من البكونة، المدارس الابتدائية الحكومية كانت بداية الواقع في حياة الأطفال اللي اول مرة يبعدوا عن مراقبة اهاليهم فترة المدرسة. عموما انا مش من الناس دي علشان كان من حظي اني كنت بقضي جزء كويس من الصيف في قرية والدتي وهناك كنت باخد راحتي على الاخر، يعني هناك ما حدش بيقلق عليه لأني ممكن أكون في بيت جدي واسرح اروح لبيت خالتي او بيت خالي أو أي بيت معرفوش لأني بكون متأكد أنه قريبنا حتى لو من بعيد، برضه الصعيد عالم تاني امان وكرم وحاجات كتير. ومن اول إجازة صيف في المرحلة الابتدائية بدأنا نشارك بقى في استعدادات شهر رمضان المبارك، والاستعدادات كانت بتبدأ قبل رمضان يجي بأسبوعين كاملين ويمكن ما نحلقش نخلصها، وأول الاستعدادات دي نزولي مع اهلي علشان نشتري ياميش رمضان، واخلي بالي من ماما في الزحمة باعتبار اني راجل بقى، واخر المشاوير دي بابا ياخدني ويجيب لي جلابية جديدة وفانوس جديد، ما انا ما كنتش بلبس الجلابية دي الا اول يوم رمضان واخر ليلة في رمضان. بس دي مش كل الاستعدادات، ده في استعدادات بالنسبة لي كانت اهم من كل اللي فات ده، زينة الشارع والنور والفانوس الكبير، وبصراحة في المرحلة دي انا كان دوري طبعاً صغير قوي، يعني الف على الجيران والم من كل شقة ربع جنيه والكبار بقى همه اللي يعملوا كل حاجة. كان من اهم الاستعدادات اننا نقسم فريق كورة مع ان اللي في سننا ما نعرفش نلعب قبل نص الليل علشان من بعد صلاة التراويح بيبدأ دوري رمضان، وطبعاً مش مسموح لطفل في السن ده يقعد في الشارع كل يوم لحد السحور. اما بقى خزين الشمع اللي كنا بنعمله علشان يكفينا رمضان كان مهم جداً لأننا ممكن في نص الشهر ما نلاقيش شمع عند حد، انا ما اعرفش الجيل دلوقتي يعرف ايه عن الشمع لكن خليني اقولهم ان زمان ما كانش في بيت من غير شمع لأن الكهرباء كان بتيجي لنا زيارات، علشان كدة كان الشمع واللمبة الجاز أحد أهم أدوات البيت المصري، ما الحياة في نهاية السبعينيات كانت صعبة جداً، كهرباء بتقطع كتير ومية ننتظرها بعد نص الليل علشان نحوشها وما كناش نعرف ان ممكن التليفون يكون في البيوت لأننا كنا بنشوفه بس في المحلات الكبيرة والمدرسة، والشوارع الغير عمومية كانت لا مرصوفة ولا متبلطة والشوارع بتكون ضلمة وطبعا الجاز "الكيروسين" من اهم السلع الرئيسية علشان الباجور "موقد الكيروسين" ولمبة الجاز والكلوب الجاز، وعلشان كدة كان بياع الجاز بيلف بعربية الجاز في كل الشوارع. يمكن فكرة حبل النور اللي في رمضان ده كانت فكرة رائعة لأنها كانت بتفضل متعلقة طول السنة وتنور الشوارع علشان العتمة وحشة، اما بقى موضوع ارض الشارع اللي كان ساعات بنجيب له رمل يتفرش بعد ما نكنس الشارع كويس ونشيل منه كل الطوب اللي ممكن يوقعنا واحنا بنلعب ده كان حوار كبير لأننا لازم نشارك كذا شارع علشان نجيب عربية نوزعها على اكتر من شارع. ومن ضمن الاستعدادات تخيلوا كنا بنعمل طيارات ورق علشان نسلي صيامنا الصبح، كل واحد فينا يطلع فوق سطح بيته علشان يطلق طيارته في الهواء لحد ما نسكنها على اخر الخيط اللي معانا وإذ فجأةً أي طائر يخبطها نلاقى الطيارة بتترنح وتلف حوالين نفسها لحد ما تشبك في حاجة او تتشد جامد فنضطر نسيبها تروح لحال سبيلها. الذكريات كتير وادينا مع بعض الشهر الكريم وكل سنة والجميع بخير

رمضان كريم

التعليقات

رمضان كريم

رمضان كريم

التعليقات