الشاطر مش بيتساب... الشاطر هو اللي بيسيب كنت فاكر إنك بتضغط

الشاطر مش بيتساب... الشاطر هو اللي بيسيب كنت فاكر إنك بتضغط عليه، بتكسره، بتخليه يفقد الأمل علشان تسيطر أو تزنقه. بس الحقيقة انك كنت بتعلّمه إنه مش محتاجلك. كنت بتجهزه عشان يمشي في أقرب فرصة، عشان يبقى أقوى و ينجح بعيد عنك، وينساك مجرد ما يخرج.من عندك. الشاطر مش بيقعد يستنى حد يعترف بيه، مش بيدخل معارك على تقدير مش موجود، ولا بيحارب عشان يقعد في مكان شايفه أقل منه. مش هيعيط على اللي فات، و لا هيكتب بوستات حزينة عن إنه كان نفسه يكمل. هو بس بياخد شنطته و يمشي. عارف طريقه، مش مستني فرصة، هو اللي بيصنع الفرصة. مجرد ما يسيبك هيبقا مشغول… مش بفشله في مكانك، مش بغلطتك، مش بأنه يثبتلك إنك خسرت… لا، هيبقا مشغول بحياته الجديدة، بفكرته الجديدة، بنجاحه الجديد. أما أنت يا مدير لسه بتحاول تلاقي حد يسد مكانه، بتقعد تفكر إزاي كان بيحل المشاكل اللي كنت بتطنشها، إزاي كان شايل الحمل لوحده في الوقت اللي كنت بتقوله فيه "هو انت بتعمل ايه يعني؟" بس خلاص، الوقت فات. قطر الشاطر اتحرك… وانت اللي وقفت مكانك عالمحطة. الخسارة مش خسارته، خسارتك. هو مش بيفكر فيك، لكنك هتفضل تفكر فيه كل مرة تلاقي الدنيا واقفة، كل مرة تكتشف إنك خسرت حد كان بيخلّي المكان دا شغال. المشكلة عمرها ما كانت عنده… المشكلة كانت عندك. لكن للأسف، عرفت الحقيقة بعد ما بقيت مجرد مشاهد في قصة نجاحه الجديدة. #في_الهامش_مع_احمد_اشرف

المنشور

التعليقات (1)

المنشور

التعليقات (1)