. . أنا حياتي كلها اتغيرت في 60 يوم، وانقلب حالي بين يوم ولي

. . أنا حياتي كلها اتغيرت في 60 يوم، وانقلب حالي بين يوم وليلة، لأن اللي حصل معايا صعب وقاسي. .. فجأه صحيت م النوم لقيت نفسي على سرير في مستشفى ورجلي مقـ طوعة، ولازم أعيش بقدم صناعية! واللي محدش يعرفه ان عملية بتر رجلي تمت بدون علمي، ولا بموافقتي، لأنها تمت بحيلة من أختي الفنانة بدرية طلبة! . . الحكاية بدأت بألم خفيف في رجلي، والأطباء كانوا بيقولولي موضوع بسيط لكن تدهورت حالتي، ووصلت إلى مرحلة الـ " غرغرينا" ،وبمرور الوقت، تحول الألم لجرح ضخم يزيد طوله عن 30 سم .. معرفش ازاي ده حصل ! وصلت لحالة نفسية صعبة جدًا، ودخلت في حالة اكتئاب ورفضت أتعالج أو أروح أي مستشفي . .. شقيقتي بدرية طلبة، عملت حيلة نفسية عشان أدخل المستشفي وهناك قالوا لازم البتر، لكنها خبّت عليا ، وقالتلي: "هتاخد حقنة عاديه علشان هتخف .. والحقنة دي كانت بنج للعملية! .. صحيت وفتّحت عيني بعد ما فوقت م البنج ، واكتشفت إن رجلي مش موجودة، ودي كانت لحظه صعبة عليا، كنت علي وشك الإنهيار لكن تمالكت ولقيت نفسي بكلّم ربنا بدموعي وأقوله: "أنا ضعيف وبين ايديك .. مليش غيرك" . . كلامي مع ربنا خلاّني أقدر أتعامل مع الصدمة من غير ما أضعف، وجالي خاطر داخلي قاللي وكأنه رسالة : « تقبّل الأمر وهنراضيك .. كأنه صوت الله بيكلمني »، أنا كنت ساكن ع البحر في اسكندريه وكنت متعود من وأنا طفل أروح للبحر وأتكلم مع ربنا وأبعتله رسايل كمان .. كنت أقول لـ البحر "يابحر قول لربنا أنا زعلان .. ولما أكون فرحان أقوله قول لربنا أنا فرحان" .. البحر كان هو الواسطة بيني وبين ربنا" .. بعد العملية في المستشفي قررت أواجه المحنة بروح قوية لكن طلبت من ربنا طلب : "متخلّنيش أضعف وأبكي"، في اللحظه دي فوجئت بربنا بعت ليا تعاقد شغل اثلج صدري على عمل فني ورئيسي في مسرحية مع الفنان القدير يحيى الفخراني، رغم إني بقيت بقدم صناعية وعاجز! ربنا كان بيطبطب عليا بالرزق ده بدل ما أرجع البيت من غير شغل وأبدأ حياتي على عكاز أو كرسي متحرك! لمّا مضيت العقد فرحت وبصيّت للسما، وتخيلت نفسي وأنا عند البحر وبقول لربنا : "أنا راضي باللي حصل .. بس خليك جمبي .. ولا تحوجني لحد" البحر هو الصديق المشترك اللي بيني وبين ربنا، وعمري ما حسّيت إن ربنا خذلني، أنا مؤمن بأنه من المستحيل لأي شخص عايز يترك أثر في قلوب الناس ميكونش له علاقة مع ربنا، والمُقصر في علاقته معاه بيخسر كتير! .. قبل الأزمة دي كنت موجود في السينما والشغل، وكنت بخاف أبعد أو أتنسى، لكن بعد اللي حصل جاتني رسائل الطبطبة من ربنا وكانت واضحة: "أنت موجود .. وهتكمّل". .. الفنان شريف الدسوقي لـ برنامج (كلّم ربنا .. مع أحمد الخطيب) على الراديو 9090 #في_الهامش_مع_احمد_اشرف

المنشور

التعليقات

المنشور

التعليقات