. . أنا مكنتش بصلّي، وكنت بعيد عن ربنا، لأني قعدت فترة زعلان

. . أنا مكنتش بصلّي، وكنت بعيد عن ربنا، لأني قعدت فترة زعلان علشان وفاة أبويا اللي كسرت ضهري ومكنش ليا غيره، ولما بدأت أغني وبقيت مُلحن قالولي الغنا والمزيكا حرام، وبدأت أفكر وأسأل نفسي: "هو اللي أنا بعمله ده حلال ولا حرام؟" . . كنت أسمع ناس بتقول إنهم حرام، وده خلاني أدوّر ، مكنتش لاقي حاجة واضحة في القرآن أو السنة بتقول إن المزيكا حرام، وعِشت في حالة تفكير، لحد ما لقيت كلام فضيلة الشيخ الشعراوي بيقول : "الغنا جميله جميل .. وقبيحه قبيح" ، فسألت نفسي: طب اللي بعمله ده جميل ولا قبيح ؟ .. وفي يوم م الأيام كان عندي حفلة فيها حوالي 10 آلاف واحد، وقبل ما أطلع قلت لنفسي : لو اللي أنا بعمله ده حلال، وأنت يارب راضي عنه، اديني علامة، ولو اللي بعمله ده حرام، وضحلي وأبعدني عن السكة دي" . . طِلعت المسرح فوجئت بالناس بتغني معايا، وكانوا مبسوطين جدًا، وفي نهاية الحفلة، لقيت كتير منهم قالولي: "إنت بتبسطنا .. وتسعدنا" فحسيّت إن طريقي سليم. .. يومها مشيت في الشارع ونفسي كانت صافيه وبدأت علاقتي بربنا تتكوّن، فكلّمته وعاهدته إن أي عمل أقوم به لازم يكون مناسب، ميكونش فيه حاجه تزعلّه ومترضيهوش! . . الحرام هو إني مظلمش ومأذيش حد ، ولا أغتاب أو آخد حق حد ، أو أبخس حق حد وأقهره ، الحرام إني مكونش ضار وحقوق الناس ومشاعرها واحترامها وتقديرها خط أحمر .. والحلال إني أساعدهم وأقف معاهم في الآمهم واحتياجاتهم، ولو معرفتش أفيد الناس مضرهومش! .. وإنك تسعد وتبسط وتدخل السرور وتعين اللي حواليك علي مصاعب الحياه ، . . أنا مش فيلسوف ولا فقيه ولا واعظ ، أنا جاوبت لنفسي علي سؤال الحلال والحرام اللي الناس كانت بتقوللي ان شغلي وغنايا ومزيكتي حرام والحرام إنه يكون عندك قدرة تقف جمب محتاج ومسكين وفقير ومتساعدوش، أو تكون مؤذي وظالم ومفتري ومُتجبر.. الحلال عندي هو فعل الخير بكل أشكاله ومساعدة غيري .. أو ع الأقل ميلاقيش مني أذي! . . لما بدأت أتكلم مع ربنا رِجعت أصلّي ومسبش فرض، لدرجة إني حبيت الصلاه، وبقيت أحسّ إنها مش مجرد فرض، لأ، دي لحظة حلوه بكلّمه فيها وأشكره على كل حاجة، علاقتي بربنا بقت زي الصاحب، دلوقتي بقدر أكلمه وأنا مستريح، وأحسّ إنه معايا وحواليا، وإن أي حاجة راحت أكيد خير وهتتعوض! . . لما أبويا مات ، كان ده أصعب موقف في حياتي، حسيت إن ظهري اتقسم، لأنه كان عكازي وسندي، وزعلت أوي ، بعدها ربنا بقي معايا ومساندني وبيعوضني، وكل حاجة بقت أسهل لما بقيت أخد ربنا معايا في كل قرار، .. علاقتي بربنا بدأت بأفكار بسيطة جدًا، بتكلم معاه زي ما بتكلم مع أقرب حد ليا، بقيت مُتقبل كل اللي بيحصلي إنه فيه خير ، وأكتر الأوقات اللي بحسّ فيها بربنا لما بكون زعلان، مش عارف ليه، بس وقت ما بنكون زعلانين، بنحس إننا محتاجين نلجأله أكتر من أي وقت تاني .. ملناش غيره! .. هاني الدقاق مطرب وملحن ومؤسس فرقة مسار إجباري لـ برنامج (كلم ربنا .. مع أحمد الخطيب) على الراديو 9090 #في_الهامش_مع_احمد_اشرف

المنشور

التعليقات

المنشور

التعليقات