حكاية النائب عادل زيدان

. . أنا اتولدت في أسرة فقيرة جدًا، أبويا كان موظف بسيط في شركة الغزل والنسيج، وآخر اليوم فلاح بيعزق في الأرض عشان لقمة العيش، وأمي ست بيت غلبانة، بس الحقيقة كانت سندي وسند أبويا في كل حاجة. كبرت وسط إخواتي البنات، وكنا بنشوف الدنيا بعين صغيرة، أبويا قرر يعزل عن إخواته ويشتري بيت من الطين، سقفه قش وخشب، البيت كان بسيط جدًا وبيحارب الظروف الصعبة. رحلة الفقر دي والحاجة اللي شفتها أنا وأسرتي علّمتني إن البداية مهما كانت صعبة، ممكن تبقى شرارة لحلم كبير، بيت الطين ده كان أول خطوة في طريق مليان تحديات وأمل. . . أول صدمة في حياتي لما دخلنا البيت والسقف قش وخشب، وكنت فاكر إننا أخيرًا هنلاقي أمان، لكن المطر نزل علينا بالليل، وإحنا نايمين . . الليلة دي أنا منمتش، ساعتها رفعت عيني للسماء وكلّمت ربنا: «يرضيك كده؟ أنا أقدر أتحمل، بس إخواتي الصغيرين يتحملوا إزاي؟ أكيد عندك الحل، جيراني اللي بيلعبوا معايا في الشارع بيوتهم بالطوب والمسلح .. ليه سايبنا للمطر؟ الموضوع ده لازم يتحل». في اليوم ده عرفت معنى الشتا وقسوته علي الغلابة، مش بس برد ومطر، لكن إحساس بالضعف والعجز، ومن يومها وأنا عارف إن ربنا بيختبرني، وإن كل وجع بيبقى بداية لحلم أكبر. صحيت تاني يوم الصبح، وأنا متأثر باللي حصل، رحت على أقرب بيت من بيوت الجيران اللي مبنية بالمسلح، دخلت وبصيت ع السقف، ملقتش ولا نقطة ميه نازلة، البيت نضيف، آمن، كأنه بيحضن أهله، نزلت دموعي ورفعت عيني للسماء وقلت: «يا رب أنا عايز زي ده»، ومن اللحظة دي بدأت الحكاية. . . أنا ابتديت أتكلم مع ربنا كأني بكلم صديق، أقوله: مفيش غيرك، هقول لمين؟ كنت مستني ليلة القدر في رمضان عشان أدعيه من قلبي: «يا رب غيّر حياتنا، أنا عايز بيت مسلح.. مش عاوز بيت من طين». وقررت أشتغل وأنا طفل.. بقيت أنزل الغيط أجمع قطن، وأساعد أبويا وأمي في شغل الأرز، عشان نبني البيت قبل الشتا، عشان المطر ما يغرقناش تاني، وعملنا جمعية، وقبضنا 3 آلاف جنيه، جبت حد بيبني بالقسط، ودي كانت النقلة. الرحلة دي كبرت معايا، واستمرت لحد ما ربنا وفقني أشتغل في شركة كبيرة، بعدين روحت مزرعة واشتغلت عامل، وصاحبها استغرب وقال لي: «إنت خريج بكالوريوس تجارة وبتشتغل عامل إزاي؟ من بكرة هتبقى مشرف»، وفعلاً بقيت، واشتغلت كمان في محطة الفرز بالليل، كنت باخد مرتبين، وما بروحش البيت غير قليل. ابتديت أتابع الوظايف الخالية في الصحف، لحد ما اتعينت محاسب في شركة الصبح، وبالليل تسويق كول سنتر في محطة فرز الخضار، كنت بشتغل ليل ونهار، بس كنت حاسس إن كل تعب بيقربني من الحلم اللي بدأ من بيت الطين وسقف القش. . . أنا طول عمري بكلّم ربنا، ما بقطعش حديثي معاه، هو رفيقي في كل خطوة. كنت دايمًا أفتكر بيت الطين، الفقر، والسن الصغير اللي عشت فيه العوز، وكنت أقول: «يا رب نفسي أبقى عندي شركة، وأزرع الأمل في الناس الغلبانة اللي زيي». في يوم م الأيام وأنا بشتغل ليل ونهار كنت راكب عربيتي ع الطريق الصحراوي، العربية انفجرت وولعت، والدنيا كلها اتقلبت، عملت حادثة كبيرة.. دخلت المستشفي أقرب للموت من الحياه وقعدت سنه كاملة.. الحادثة دي كان فيها لطف كبير من ربنا، كل الناس اللي ليها فلوس عندي جم زاروني وقالولي: «يا حي رزقك جاي».. في المستشفي وأنا علي سرير الموت عقدت صفقات شغل نقلت حياتي، ومن هنا ربنا أكرمني وخرجت من الحادثة رجل أعمال. أنا قعدت فترة طويله من زواجي مبخلّفش، كشفنا أنا وزوجتي كتير، وروحنا لدكاترة كتير علشان الخلفه لكن للأسف مفيش .. لمّا وصل الخبر لمراتي إني عملت حادثه أُغمي عليها .. ودوها المستشفي وهما بيكشفوا عليها فوجئت بإنها حامل في توأم ومكنتش تعرف! .. يعني ربنا أعطاني توأم وأنا بين الحياه والموت .. كان بيطبطب عليا ويراضيني .. في الحادثه دي شفت آيات .. وعرفت يقينا إن الخير يكمن في الشر! قمت من الحادثة أول حاجة عملتها رحت عمرة، وأول دعوة طلعت من قلبي: «يارب أنا عايز أبقى نائب في البرلمان.. ولو بقيت هخدم كل اللي يحتاجني»، يومها نمت وفي الحلم شُفت نفسي تحت شاور عسل، وجسمي كله نحل، عرفت إنها البشارة، ولما اتحققت، قولت: «يارب أنا خدت كل حاجة، وأنت رفيقي في كل رحلتي». . . اللي يتولد في بيت طين، ويشوف المطر بيغرّق سقفه، ويتعلم من الفقر، ويكلّم ربنا في كل خطوة، لازم يعرف إن الطريق مش مستقيم، لكنه مليان منحنيات علشان تربّيك وتعلمك الصبر، الحكمة إنك ما توقفش عند أول سقف بيتهد، ولا أول حلم يتأخر، لأن ربنا بيأخر الاستجابة عشان يجهزك للنعمة، واللي يفضل يحلم ويكافح، ربنا بيخليه مش بس يحقق حلمه، لكن يبقى سبب في أمل لغيره. أنا عمري ما نسيت بيتنا اللي من الطين ولا أول ليلة كلمت فيها ربنا لما المطر نزل عليا وعلي إخواتي البنات لأن البيت ده اللي لقيت فيه الكنز .. والكنز بالنسبالي هو ربنا .. اللي كان في الرحلة! . . النائب عادل زيدان، عضو مجلس الشيوخ، لـ برنامج (كلّم ربنا.. مع أحمد الخطيب) على الراديو 9090 #في_الهامش_مع_احمد_اشرف

حكاية النائب عادل زيدان

حكاية النائب عادل زيدان

التعليقات

حكاية النائب عادل زيدان

حكاية النائب عادل زيدان

التعليقات