بدأت رحلتي من أيام الجامعة في تطوير الذات… وبعد سنين من التد

بدأت رحلتي من أيام الجامعة في تطوير الذات… وبعد سنين من التدريب والكتابة وإصدار 4 كتب، اكتشفت إن بوصلة حياتي كانت بتقودني لطريق تاني خالص.👇 الفرق بين دلوقتي وبين من 8 سنين… إن زمان كنت بحاول أتحرك كتير، لكن من غير ما أكون فاهم الاتجاه الحقيقي. وقتها بدأت أهتم بتطوير نفسي، وأقرأ، وأحضر تدريبات، وأتعلم. ومع الوقت اشتغلت في مجال تطوير الذات، ودرّبت ناس كتير، وبدأت أكتب. لحد ما ربنا وفقني وأصدرت 4 كتب كانت جزء من رحلتي وتجربتي مع الناس والحياة. في الفترة دي كنت شايف إن ده هو الطريق… وإن النجاح معناه إنك تكمل في نفس الاتجاه وخلاص. لكن الحياة علمتني درس مهم جدًا… إن الطريق ممكن يتغير، لكن اللي لازم يفضل ثابت هو البوصلة. البوصلة هي اللي بتحدد اتجاهك في الحياة. ومع التجارب اكتشفت إن في موهبة جوايا كانت موجودة من زمان…موهبة الصوت. الناس دايمًا كانت تقول لي إن صوتي مختلف، وإنه يشد الانتباه من أول كلمة. وقتها قررت أبدأ من جديد… أتعلم وأتدرب وأطوّر الموهبة دي. ومن هنا بدأت رحلة تانية خالص. رحلة دخلتني عالم التعليق الصوتي والإعلام والصحافة، وقدرت أشارك في أعمال وتجارب كتير وأتعلم من ناس مختلفة. وقتها فهمت حاجة مهمة جدًا… إن الإنسان ممكن يقضي سنين بيبني نفسه في اتجاه معين، وبعدها يكتشف إن بوصلة حياته بتقوده لاتجاه تاني. وده مش فشل… ده تطور طبيعي لأي إنسان بيجرب ويتعلم. عشان كده كل فترة لازم نقف مع نفسنا ونسأل 3 أسئلة بسيطة: أنا فين؟ رايح فين؟ وهروح إزاي؟ الأسئلة دي هي البوصلة. ومن غير بوصلة ممكن تتحرك كتير… لكن في الاتجاه الغلط. ومن بداية رمضان السنة دي قررت آخد خطوة هادية مع نفسي… وأعتبرها محطة مراجعة. أراجع فيها بوصلة حياتي مرة تانية. وأفكر بهدوء: إيه اللي محتاج أطوره في نفسي؟ وإيه الخطوة اللي جاية في حياتي المهنية؟ وإزاي أكون نسخة أفضل من نفسي… مهنيًا وإنسانيًا. لأن الحقيقة اللي اتعلمتها بعد السنين دي كلها… إن البوصلة ممكن تتغير مع كل مرحلة في حياتك، ومفيش مشكلة إنك تقف شوية وتعيد ضبطها. المهم إنك تفضل صادق مع نفسك… وتفضل ماشي في الطريق اللي حاسس إنه طريقك فعلًا. لأن النجاح مش بس إنك توصل… النجاح الحقيقي إنك تبقى عارف أنت ماشي فين. #في_الهامش_مع_احمد_اشرف

المنشور

التعليقات

المنشور

التعليقات