مشهد وشاهد ع الجميع مش ناسي حد ولا بيتوّه الصوره بالألوا

مشهد وشاهد ع الجميع مش ناسي حد ولا بيتوّه الصوره بالألوان والشكل متموِّه و الأثر فوق الوشوش بيبان و الأصل يتموِّه واقف مابين الناس سكوت يرسم مشاهد ع البيوت من قبل صرخة الف صوت من قبل ما ينطق يموت برسم صور ممسوح ملامحها وصوت ضمير الناس سكوت إلزم حصاد العمر من زرع الجدود واحلف بإن الزاد خلص يمكن تفككلك قيود حال الجموع يشبه لحال المايه من بعد الجمود تضحك ولكن بالدموع يمكن يبان صوت الصراخ فوق الشاشات ع الأرض بان وضجيج هناك خلف البيوت طلقات رصاص وصوت صداه الروح مفارقه الروح خلاص وصوره تاني لعاشقين ماسكين ايدين والضحكه كانت ع الوشوش قال ما تخافوش بكره تضحكلي الوشوش بكره نلاقي المتعبين بقوا مبسوطين فما تزعلوش فجأه صوت الضحكه راح والصراخ وقت الصباح والضحكه راحت م الوشوش مابيسكتوش زايد رتوش فوق الحروف فما تزعلوش ناقصه الرتوش حرفين كمان ماتدققوش الحق بان واستبان الفجر من بعد السكون أصوات كتير، وصدا البكاء عم المكان طلقه كانت فى الجبين إنت مين؟! على فين تروح وسط السكون والكون براح الصمت راح زاد الصراخ قَلَب الصباح بقى ليل طويل خلف العيون دمع وغيوم وظلام عليل .. .. وهناك كمان فوق المباني الشاهقه منظار بيخطف فى الثواني معاه دهور كم صوره ينفع تترسم من غير كسور من غير ضباب فوق المشاهد كلها طب ليه بتبكينا الساعات جوا البيوت واحنا بداية وقتها ، ومن وقتها سقط الميزان! والحق اصبح شيء مهان والدمع سال كون غيوم تشبه سحاب شباب وشكله كان شباب فجأه روحه بقت غياب قبل إنسحاب الروح يقول أنا مش بخون والدم عمره في يوم ما هان ولا عمره هان حتى التراب فاضل هنا ساعتين / قبل إكتمال الصوره والمشهد فاضل هنا لونين /ولون السواد ع الكل راح يشهد مين كان يقول، إن المشاهد عندنا، فى الحال هتتبدل نقطة أمل في الضلمه بتنور عمر الشباب في القصه ليه قُصير كانوا بحلمهم عايشين فاكرين إنهم عرسان صوت الضمير في الفطره كان إنسان اسمع نشيد الحق في بلادي إسمع لصوت الصوره بينادي اضرب بأيدك فوق جبينك وافتكر كل اللى ماتوا قبل منك وأفتكر راحت دماء المُتعبين زيك هدر وقولي مين؟ رسم الحكايه وقام غدر حتي الوطن لمَّا سَمع عن واقعة الليلة الأخيره في الميدان قام واعتذر مين فى النهايه قال شهيد !؟ ومين اللي قال شبه الغجر! أصلًا ضميرك مش سليم؛ ولا فيه صفات الخير، ولا أصلك بشر أول طريق العاشقين فيها السفر وأخر طريق الظالمين قالوا فى سقر #عامية_مصرية #ألبوم_صور #كرم_محمد_حربي

المنشور

التعليقات

المنشور

التعليقات