ضمينى

- - محتاج أتم السكة للأخر محتاج وصول للبر لو مره بس الهموم محتاجه تتاخر واشد روحى للهدوء بره أعجن سلامي واخبزه ع الراح واسحب ملامحي من حشا الأتراح وانسج كلامى في انسجام البوح لا حزن عايز أو دفوف أفراح ضميني يمكن أو بلاش ممكن الحزن أفتن روحى وقتلها والضحكه طَاله من عنين هاله ضحكة شماته صفره وحويطه يا جد يالى نقشت الحكمه ع الحيطه وبنيت حكايتك من صخور الواد الواد كبر وملامحه مكسوره فازاى حتنحت سحنته تمثال غُلبت أقوله الضحكه في الصوره محتاجه مني هدوء وراحة بال مهما كدبت ملامحى فضاحه كل اما اشد يقولى براحه نَفسي انقطع م الشد إرحمني إرمينى يمكن روحى تلهمني وابدأ خطاوى الحلم براحه أنا كنت حصرخ بس بصراحه شفت الهوان بيطل م الطاقه وفرت صوتي ودوبت في التأويل وندبت لكن كان نقصنى عويل ودموع كتير شاحه من النني خبيت عيونى ف كفى اكمني فاتت عليَّ كتير من التفاصيل الصورة وحشة والملامح ليل والضحكه حازت بسمة الأندال كانوا العيال بيلعبوا الحَجْله كان الحلال خص العجوز آدم هو عجوز اكمنه متعكز على جريده من ستار البيت هو ولد اكمنه بيأكد إن الجراد مدفون في قلب الغيط صوته أمان إن العيال تلعب تخبط وترقع حتى جوف الليل لكن غيابه محنه ومتاهه صوت العيال يخفى في قلب الحيط ضمنى يا اما وغطى اوصالي شايف عيون في العتمه بصالي شايف خيال بيحط ع الجدران آدم رحل ومعاه راحة بالى أشد نفسي من حكاوى زمان وارجع لروحى وعتمة الأحزان واشحت طريق يلهمني مسافاته يحضن خطاوى المحرومين ويمد أوصل ألاقى الشط مستني واحضن رماله بروحى اكمني محتاج وصول يلهمنى حكاياته.

ضمينى

التعليقات

ضمينى

ضمينى

التعليقات