أكتر حاجة تقهر إنك تشوف شاب بيهلك صحته في شغلانة بياخد فيه

أكتر حاجة تقهر إنك تشوف شاب بيهلك صحته في شغلانة بياخد فيها ملاليم عشان بس يصرف على نفسه! الشاب ده مشكلته مش إنه غبي أو كسلان مشكلته إنه محتاج حد ابن حلال ياخد بإيده ويعلمه مهارة حقيقية تفتحله باب رزق بدل ما هو تايه في عشوائية اليوتيوب أو كلام الجامعة. وفي نفس الوقت تلاقي عيل بلوجر في إعلان ممول بيبيع للشاب ده كورس وهمي عن إزاي يعمل ٥٠٠٠ دولار في الشهر وهو نفسه معملش ٥٠٠٠ جنيه من شغل حقيقي وكل شغلانته يبيع كورسات كلها كلام فاضي. طب فين اللي فعلاً فاهم؟ مدفون في شغله ومطحون ومبيعملش فيديوهات ولا بيبيع كورسات؛ لأنه ببساطة مش فاضي ووقته بفلوس. النتيجة إن الساحة بتخلى للنصابين والشباب الغلبان بيدفع دم قلبه في كلام باقة النت خسارة فيه إلا مَن رحم ربي. عشان كدا قررت أعمل حاجة جديدة مشروع كورسات للشباب هتكون مجانية أو بسعر التكلفة الحرفية بس مش كورسات عامة وكلام فاضي لكن مهارات مطلوبة (فريلانس) وبتجيب فلوس فعلاً. وهنا ممكن حد يستغرب ويقول إيه اللي يخلي شيخ يسيب شغله ويدخل في قصة كورسات؟! الحقيقة إن دورنا مش مقتصر بس على الكلام عن الصلاة والوضوء أسيادنا زمان كانوا علماء في كل مجالات زمنهم والدين اللي أمرنا بالعبادة هو اللي أمرنا ننقذ الشباب من الضياع ونحطهم على أول طريق الرزق. الرسالة دي بقى لصنايعي (الفريلانس) للحوت اللي إيده في الشغل وعنده التركات اللي مبتتقالش في الكتب أنا مش جاي أقولك اعمل عمل خيري على حساب وقتك أنا هدفع 😂 وعارف إنك مش فاضي تكتب وتصور وتمنتج عشان كدا وفرتلك فريق محتوى كامل بياخد منك المصادر والتركات يكتبها وتراجع وراهم وتيجي تنورنا في الاستوديو في مدينة نصر تسجل. يعني كل اللي هحتاجه منك ٣ أيام بالكتير وكل وجع الدماغ بتاع الإنتاج على فريق المنصة. خلينا نتكلم ونعمل حاجة تعيش وتغير حياة ناس بإذن الله.

المنشور

التعليقات

المنشور

التعليقات