زي البشر خطّاء زي الملايكة نضيف ف الخلوة واد بكّاء ف اللمة دمه خفيف ميال إلى الشهوات لكن ب طبعه عفيف وف احلك الازمات م سرقش حتى رغيف يضعف قصاد الميل وميله كان حريف آدم أبوك أكّيل ف لمين هتبقى شريف يرفع ايديه لله يقول ياربي ضعيف ولظلم خلق الله عمره مكان هتّيف شافت عينيه الزور معرفش يبقى كفيف وقصاد ايدين الجور ف قلبه ماسك سيف مش زي باقي الناس اللي ارتضوا ب الزيف شربوا المذلة ف كاس والسُكر اصبح كيف مكانش م الفرسان ولا كان أسد ومخيف لكنه عاش ندمان ومات بقلب نضيف شاف ف الطريق للسما كام لمحة زي الطيف الناس سكارى إنما ب يفوقوا كدة تخاطيف وفي وسط الخطّائين كام قلب لسة نضيف وفي زمرة الباكيين كام حد دمه خفيف ..
