تفاصيل المنشور

قاللي الغريب بصّرني من رؤيتك قاللي الطريق نوّرني مِن عتمتك قاللي الزمان الحُزن من بَسمِتك بُكرا الليالي تموّتك فَ تعيش ونّست كُل الخلق من وحدتك ورجعت قبر الذكريات تفتيش إنت الدليل والتوهه دي لعبتك خرجنا منها برُزمة الملاطيش .. خايف وخوفك ع اللي خاف خوّفك شايف وشوفك للي شاف شوّفك قلبك شوارع والبشر مساكين عقلك إزاز والكل بيحدّفك .. ولّعلي نور الدنيا دي وقولي.. مين اللي طفّى الحلم في عيوني! علّيلي سوري، الحُزن بيطولّي بكسِلي يوم البُعد في جفوني السطر شادد حِبري من دمعتُه فكّرني لما الكُل نسيوني .. بصّرني إمتى الصدق هينجّيك واكدِب وخلّي المُهلكات تهلِكك شِد الشبك والطُعم من تحتيك واستنى كُل الأُمنيات تُدركك إقتل ماضيك الدُنيا هتخبيك علشان في فيلم المُخلصين تِشركك .. كُتر الخُطى وإن كان غلط تعليم الجرح بعد الجرح ليه تأليم الظن ساحر بس مش مُلتزم و الفن فارس حرب بس سقيم .. إضحك في وقت الكُل بيبُصلك علشان يشوف الدمعه وتفرّحُه من فحم قلبّك قولها ترصّلك حجرين يجيبوا العقل وتطوحه بَصه في عيون الكدابين إثبات إن الجميل بالكدب ما أقبحُه .. على عكس كُل اللي اتقفل، فتّح على عكس كُرهك للبشر، حبّيت على حجر حُزن الشِعر تتمرجح تكبر فَ تبني في كل شارع بيت.! .. قاللي الحزين هيوصّلك قولت الحكيم هيأصّلك الدنيا ترزي تفصّلك مع كل غُرزة تكسّرك ترجع سليم.. إمشي في طريقك مُلتوي تلقى الشوارع تِستقيم.! #أحمد_عادل_يونس 24/6/2026