تفاصيل المنشور

طول عمري مقتنعة إن مسكة قلم القصب وزاوية قطّته على الورق المقهر شغلة مستحيل حدا يفهم سرّها إلا إيد لحم ودم، لحد ما شفت لوحة مطبوعة بمعرض جانبي طالعة من أمر كتابي على كمبيوتر، الخط فيها مش بس موزون، فيه حركة تشبه تماماً نزول الحبر الزايد لما يتردد الخطاط بنص الكلمة. وقفت جنب سناء نطلع بالطبقات والملمس، وطلع من قلبي ذهول غريب، كيف آلة ما بتعرف طعم الحبر ولا بتوسخ أواعيها قادرة تحس بهالرجفة وتسرق عشوائية الإيد بدقة بتخوف. #فنون #رسم