تفاصيل المنشور

زُرت الحسين في المنام

"شي الله" يا أهل البيت

الدنيا كانت زحام

والخلق قمح في غيط

وسِت عند المقام

ماسكة العيال ف الايد

العين ماليها كلام

والقلب حزنه شديد

كت عاشقة فَرد حمام

ورسمة حلم جديد

عيالها قالوا تمام

وكتبوا فيه اناشيد

بس البعيد خمَّام

من نسل جوز وطاويط

شيد لها الأوهام

ووعدها انه يبيض

رسم لها الأحلام

وملالها بيها الحيط

عدت كتير أيام

والرسم بقى شخابيط

والست كت بتنام

تحلم تشوف البيض

ومر عام ورا عام

مشافتش غير تبكيت

كت الغلال اكوام

والخير كتير ويفيض

لكن أكلها الحمام

ومسابش غير فتافيت

مباضش غير الكلام

والرغي والحواديت

الفقر نسجه حِرام

وسكوتها كان الخيط

الحزن كان بينام

ف القلب قبل البيت

وفي يوم أتاها منام

صحيت تقول لبّيت

راحت تزور المقام

ساحبة العيال ب الإيد