وانت جاي من مصر هات
ربع طيبة وذكريات
هات لي ناس نكهة زمان
قبل ما النيل يبقى "سات"
واشتري لفة رجولة
خالية بيستاشيو وصوصات
شوف كمان حبة شهامة
م اللي كت مالية البلاد
هات نفوس سالكة ونظيفة
م اللي برة البلعات
جيب عيون لابسة
القناعة والكرامة نضرات ..
شوفلنا سعر الأصول
لسة مرهون ب الكاشات؟!
واللي بين الناس هناك
لسة برضه خُد وهات؟!
لسة مرجعش اللي راح
من محبة او وداد؟!
لسة عِشرة السنين
ب يبيعوها ب جنيهات؟! ..
لو معاك وقت ياريتك
تشتري لي م اللي فات
من حياتي قبل ما اكبر
يعني قبل الالفينات
قرية كان فيها الأمان
مش بيحتاج بوابات
حارة كل جيراني فيها
كانو اعمام او خالات
جوز صحاب بينا تملي
الكلام بس اشارات
بنت وقت المدرسة
كان جمالها ف السكات
مش بلوزة او عباية
مالية بيها استوريهات
عيلة كان الستر زادها
مش ترند وتيكتوهات ..
لسة في وزن معاك؟!
بس مش لاقي الحاجات
صدقني عارف من قبل
"شوف" او حتى "هات"
بس هتقول ايه عبيط
لسة عشمي مكنش مات!!