تفاصيل المنشور

بعد السلام

القلب فاتح البيبان

مشتاق نتقابل تاني

ويدق في قلوبنا اللقا

زي رعشة الطير من الهوى

وأرواحنا بلهفة تنادي

على رموش الرصيف ننام

نقزقز أحزاننا

أكيد بينا ميعاد

ونرجع لحضرتنا

ونتشابك في روح

ونسكر من الأحضان

ونتوضى من الدوبان

وبضحكة نتمرجح

ويرن الخلخال

ما زال قلبي واكله الشوق

بيسبح بالحب

ويطوف بالوداد

كل اللي حلم باللقا تاه

كل اللي حب مات

وغريبة أنا لسه حي

باحيا بنفس المكان

ونفس الهمسة واللمسة

ونفس الكاس

الهيمان بشفايفك

يا سارقة قلبي ببسمة