تفاصيل المنشور

(قهوة بلدي)

اتسرسب الحبر اللي في الحبّارة على الكشكول

بدأ الخيال

ماتت بتولة في انتظار فارس بتول

واشتغلت الغنوة الحزينة

اتحرّك البندول...

الحل في التجديد.

أنا شخص راديكالي.

والوعي فوق الكل.

قال المثقف نقد زي الفل

ونسي يحاسب قهوجي بيطُل.

صرخ اللي قال: الشعر قافية.

لَسَعِتُه الطَفْيَة.

رد اللي كاتب سطر نثر: الشعر مش عافية!

قال الروائي: كتبت شعر زمان

ومافيش زباين هوّبوا الدكان.

رد المترجم: إقرا بابلو نيرودا من ترجمتي.

اتّاوب الناقد.

بيصقّف المدعي

ويقول مُحرر: الحروف دي تساوي كام؟

وبينسحب شاعر

يتمتم قول:

البلاغة الليلة في حضن الصمت

قالوا إيه: إن المباشرة الحل!

لما أكتب شِعْري اعتبرني بَصَمْت

حرفي ريحته ريحان، وريحتك خل.

السر في الموهبة

مش في اللي مط الحرف كمّل جملة

مش في اللي يحلب شِعْره ياخد عُمْلة

مش في السجارة

ولا ريحة الجلد الحرير ولا في الحرارة

ولا بَلع شِعر السابقين

ولا جَلد شِعر معاصرين

ولا حاجة

بيركّبوك بالعكس أغبى حمارة

ويزفّوك

ويلفّوا بيك الكَفر

بالزمارة.

وبينسحب شاعر ورا شاعر

ويهدّهم كلهم

طول الطريق في الآخر...

النملة في الخمّارة

غِرْقِت في نقطة مَيّة

والكلب في الحارة

بيعاشر الحيّة

يا شاويش يا ابو صُفّارة

الليل مَلَان حرامية

الشعر مش صنارة

تبلع جعانة الطُعْم

الشعر مش سِلّم

يا راضعين اللؤم

الشعر مش حاجة

الشعر ولا حاجة

الشعر فيه حاجة

ضد الخراب والشؤم.