تفاصيل المنشور

مكبلين على حد الشوف و شايفين على حد لغلال شكون جرّد لغزيل من صوف و شكون كلّع لوتاد من حبال خلا الخيمة رش لهاد لكفوف و خلا الكف ف شعر مخبال و شكون مزطا الما من جوف و شكون عرى الوقت ل زوال و شكون هيّج لبحر من خوف كان شط و موجة برود لحال و كانت لحبارة ماية تشوف و كانت الموجة ركابة لهوال ملي يغضب بحر الكلمة صروف و يكون الميزان هزة و زلزال فيق يا راكد انت ميمون ألوف من تراب غطى تراب الرجال ملي بكات لسياد و أنت مكفوف ع لحق و الحق باين لندال العافسة على كلبي الملهوف يدق ف خراصي كل محال مكبلين على حد الشوف و شايفين على حد لغلال شكون جرّد لغزيل من صوف و شكون كلّع لوتاد من حبال خليني نفقص عين ضروف خليني نكون آخر دمعة تسال خليني نكون معراض سقوف نهز سقفك و نكون ليك حمّال ما برد الكلب و لا جمرة الجوف دردر الملحة على جرح سيال سيال دمعة و ضمة بين صفوف ماتت جافرة جافلة على حق السوال لي حيّر كل جواب ناقص حروف على ورقة وطني نشوفو يدبال نعطي العاهد لسبول مني منتوف أنا السبولة أنا لرض و المعدن حلال أنا السيف من حرف هاد السيوف أنا الرمح و الشهدة من وحي نحّال أنا ولد الشعب و الشعب راية رفوف أنا الكُلّة الساقية أنا الكرّاب و الدلاّل أنا أنت ملي تبغي تكونّي ملفوف لفة لمحبة و لفة كَلبي كَلْبك ميّال نغنيوها قيمة بنت قيمة تحلف ب حلوف نغنيوها مغاربة نغنيوها محبة و موال نغنيوها عدل على حجرة حج نطوف و الكعبة حنا و الكعبة كرامة الأجيال رحال الإدريسي 21/09/2023