تحابيش الصبح فى نص الليل
تحابيش
على وش الصبح فى اخر الشارع
اثنين واقفين
عربية فول، طبقين حلوين
بالزيت الحار، عندك طلبين
ورقة جورنال، مانشيت عريض
مكتوب عنوان المرسل فيه
يشكي الأحوال، والحال يشكيه
والحال من كُتر الشكوى ماليه اوصاف
تقرأ سطرين فى الباب هتخاف
هتخاف م الدنيا وبلاويها وافعال الناس
تضحك فى وشوش الناس حواليك،ومفيش احساس
الضحكه بتسقط تحت مداس الحاجه يابيه
سلملي عليه
احوال الصوره المهزوزه في تفاصيلها،
بتشبه شكل الغيم
احزان الناس بدموعها بتشبه وش السيل
وصراخ مكتوم،
و مين مش مهموم؟
ربك حنَّان،
منان بالخير
بيعين الناس
ويروح احساس
ويجي معاه للناس إحساس
مليان الخير
حكايتك إيه، حكايتي انا غير!
طبقين حلوين،
طلبين مخصوص بالزيت الحار
ورقة جورنال
مانشيت عريض
تصحيح لمسار
إعمار، إعمار
أعمار الناس فى الصوره هناك،
تشبه عُمرين
تجاعيد الوش، فى وش شباب
مسامير فى الباب، ترقيع العمر فى شكل ثياب
والحال مرسوم ع الصوره المهزوزه
يشبه لضباب وغياب في غياب
سواق اتوبيس ايده ع التاره وبيدوس بنزين
بإيديه أنفاس منقوع براطيش رايح على فين
طوابير فى محطة مترو زمان
طوابير شباك السيما فى قلب ميدان
طوابير للخوف،
طوابير للكشف فى كل مكان
إنسان، اللى بيرسم لينا فى قلب الضلمه طريق
إنسان، اللى بيسند بينا الموجه فى بحر غريق
ورفيق العمر اللى معانا والله رفيق
أهو لسه على الحاله الأولي ومفيهاش تفريق
بيشد بإيده ويسند اوجاع بتزيد
وبيمسح دمع العين بإيديه،
الله يراضيه ويعيش ايامه بخير وسعيد
الصاحب اللى عشان الصحبه يعيش بالخير
اللى يراعي العشرة ويزرع فيك أفعال الخير
الله يراضيه، ويبارك فيه
الحرف اللى هيكتب خير
و الحرف اللى هيبني حياة
ويعمر بمعاني الصحبه قلوب الغير
الله يراضيه ويبارك فيه
الله ع الشعر وأصحابه لو كان للخير
لو كان بجماله بيفسر لينا الخير والشر
لو كنا بنقدر فيه نوصل للشط نشوف البر
مركب بشراع، بيحرك فيك اهدافه لأجل نجاح
ونجاحك وسط الشعر حروف، من بَعدك ليك
الله يراضيك، لو تكتب شعر
ما تسيبش معاني الحرف مشاع
وبلاش تملانا دموع ووداع
خليك فنان بيشكل جوه الرسمه خيوط
بوضوح الفكره مع العنوان
انا اقصد إني اقولك إيه
لو تكتب شعرك، حابي عليه