تفاصيل المنشور

صارحني يا طبيب

إيه أحدث الأساليب

نقدر نداوي بيها

الدنيا لما تخيب

أنا كنت مرة زمان

في الضحكة فنان

في البسمة قبطان

في الحظ ليا نصيب

وكنت واد شاطر

لعبي وبيخاطر

وعينيا بتسافر

للشمس لما تغيب

مقدرش أقول عاقل

أو حتى أقول سافل

ولا حَد لو شاكِل

يقول لسانه العيب

شايفني في مرايتي

صلاحي وهدايتي

شيطاني وغوايتي

ب يلعبوا طرنيب

والناس ع الجانبين

واقفين كدة صفين

بين الردي والزين

بيشجعوا اللعيب

الكفة لو معدولة

ف المسالة محلولة

الحق درجة اولى

والشر بعده يغيب

بس الحياة مالت

والعدل بقى باهت

لما الاصول سابت

النقص فيها يصيب