تفاصيل المنشور

يوم الخميس وأثناء تحية العلم قبل الانصراف قال المدير انو يوم الاحد رح يكون في تفتيش ع النضافة الشخصية واكتر واحد نضيف وأنيق رح يتَوَّج بتاج ملك النضافة لمدة شهر كامل و إلو هدية من المدرسة كنت بصف التاني وسرح مخي لبعيد وتخيلت حالي لابس تاج النضافة ع راسي و رفقاتي الحاشية ماشيين ورايِّ وانا ماشي عم اتمختر انا الملك ولاااااك 🫅🫅🫅 رجعت ع البيت ركض وفتت لعند امي قومي بسرعة شغلي الحمام بدي اتحمم الاحد عنا تفتيش ع النضافة ضحكت عليِّ وقالتلي من هون ليوم الاحد بدك 20 حمام اليوم المسا بحممك وليلة الاحد كمان حمام تاني والحمَّام بين إيدين امي وما ادراك ما الحمَّام أول الحمَّام كفوف و أوسطو سلخ كفوف وسلخ جلد عن العضم واخرو ضمة مع بوسة وحمام الهنا ياحلو اخر حمام تحمتتو حسيت حالي كبرت وانو صرت قادر اعتمد على حالي وعملت 100 مشكلة مع امي مشان ما تفوت تحممني وصار يلي بدي ياه ليلة الجمعة تحممت لوحدي بس ليلة الأحد ومشان اضمن التفوق بالنظافة والعلامة التامة سمحت لامي تفوت من البداية للنهاية معي ع الحمام بلشت تشلحني الكنزة وكانت القبِّة ضيقة وانا راسي كبير 😁 وامي تشد لفوق وانا انزل لتحت وحسيت رقبتي صارت اطول من رقبة الزرافة واختنقت ورح تطق حنجرتي واني اغرق ... اغرق في الحمام اني اغرق وسلختني كف على ضهري وقالتلي يخرب بيتك راسك شو كبير و من بداية الحمام سلخ كفوف يلعن ابو تاج النضافة وابو النضافة بس بدي اتحمل ... بدي اطلع الملك ومن أول طاسة مي سخنة حسيت حالي متل الفروج المسلوق كانت المي سخنة نار ... شلوطتني شلوطة وبلشت امي تغسلي راسي بالصابون وانا بين شهيق وزفير بين ايديها و عم الفظ انفاسي الأخيرة وتحرحرت عيوني وصرت ابكي من الصابون وابكي من الوجع وامي ولا ع بالها مكملة إجرام فيني وجابت كيس حمام اسود ما بيرحم وصرت ارجف من خوفي منو قبل ما يلمس جلدي مشان الله بلا هادا ..مشان الله بلاه ولكن عبثا قالتلي ما بدك تصير ملك النظافة تحمل لكن وعلى فرك ودعك وخود وجيب و طلوع نزول .... يمين يسار سلخت جلدي عن عضمي وكل ما حوص ولوص بين ايديها وحاول اهرب تسفئني على ضهري كف خماسي 🖐️ يرن رن على بالحمام وينرسم على ضهري بألوان قوس قزح🌈 ويضل 3 ايام معلِّم على ضهري وتقلي ثبات ولااك ثبات عندي كومة شغل لسه بدي قضي كل النهار معك بالحمام واينو ثبات يامووو ركبي عم ترقص ديسكو لوحدا ورجعِت كبت عليِّ مي سخنة عم تغلي غلي وحسيت بحرقة المي اكتر من قبل بعد ما شلوطتني بكيس الحمام واجى دور الليفة وبلشت فرك فيني بالليفة وتكب مي سخنة وتليفني لحتى طلعت خلنج وكالة عم طأطئ تطؤطؤ من النضافة ولبستني تيابي وحضنتني وقالتلي تقبر قلبي طلعت عريس حمام الهنا ياقلبي ولفتني بالمنشفة وشالتني لبرة وانا عم اتشاهد وطلعت عم اتدعبل دعبلة ولوني احمر متل الشوندرة وبالسهرة قصتلي اضافيري وقصت معون كل أحاسيسي ومشاعري😖 و وصلت بالقص للحم 😢 بس تحملك فدا النضافة وتاج النضافة وكوت تياب المدرسة وعلقتون بالخزانة وقالتلي بكرة الصبح بوطك رح يكون نضيف وعم يلمع و رح حطلك جيل ومشط شعرك وبتروح ع المدرسة وفشر يكون واحد أنصف منك وكانت اطول ليلة بحياتي ما يجيني نوم وانا عم اتقلب واسرح بخيالي كيف رح أتوج وكيف رح امشي بالشارع والكل يآشر علي 👉 ليكو البطل ملك النضافة وما نمت لأدان الصبح و لاول مرة بصحى لوحدي ع المدرسة بعد ما كانو اهلي يتناوبون عليِّ ليصحوني ويشحطوني شحط من التخت وركضت لعند امي وقلتلا امي خليني اعمل دوش 🚿 لأنو بكون توسخت من مبارح لليوم ضحكت وقالتلي لأ يا مو ما طلعت برات البيت بعد الحمام و ما حلَّك تتوسخ وبعدين بتاخد برد وبتگْرب اذا طلعت من الحمام دغري ع المدرسة قلتلا حبابة ..حبابة بس 5 دقايق قالتلي عم قلك لأ بعدين بترشح و أنفك بيشرشر وبيشوفك المدير وما بيعطيك تاج النضافة وانت أنفك عم يشر فكرت شوي معا حق بعدين بمسح انفي ب كم الصدرية وبيصير الكم عم يلمع😁 حطتلي جيل ع شعري ومشطت شعراتي لفوق وبخبختلي من عطر ابي و خليت امي ما منتبهة وفتت ع غرفتها وطالعت من الدرج علبة بودرة خدود وفرشاية مكياج و حمرت خدودي ☺️ وطلعت شغلة كبيرة دعبول كربوج وغنوج عم يتغنج تطلعت بالمراية يييي من هالحلو القمرررر ☺️ ما عرفت حالي عم وج وج ✨✨ من النضافة اي ما تبلى ياعمار على هالطلة الحلو ملك زمانك اي شو هالقطافة والنضافة واللطافة تؤبشني آبش يا انا 😚 رحت ع المدرسة وطول الطريق عم أتلفت حُولي وحواليي لشوف الطلاب وكيف استعدادون للتتويج ولتاج النضافة ما لقيت حدا مهتم ادي والكل عادي حسيت شوي بالطمأنية انو لهلأ ما لقيت منافس الي بالاجتماع الصباحي وبعد تحية العلم نزل المدير تفَقُد بين الصفوف ويفتش بين الطلاب ليختار ملك النضافة وانا رغم اني كنت دعبول وقصير بس صرت اتمطمط من بين الصفوف ورح تصير رقبتي طولا مترين مشان يشوفني المدير انو انا هووون ... انا هون انا ملك النضافة الاصلي بس يمكن ما شافني المدير أو ما عبَّرني رجع طلع ع الدرج ومسك المكريفون وقال من بعد جولتي بين الطلاب والتفتيش ع النضافة شفت شي بيرفع الرأس والحمد لله الطلاب كويسين و الكل ملتزم بالنضافة بس اكيد رح يكون ملك واحد من بين الكل وملك النضافة لهالشهر الطالبة آيوشِة الطبوشة 😱😭😱 وطبعا الاسم مستعار و ما رح أفضح الطالبة وقول اسمها الحقيقي وكنيتها بس كنا نسميها ايوشة الطبوشة لأنو كانت سمينة ومدعبلة بس ما إلها علاقة بالنضافة بس يا حذركون ليش اختارها المدير إلها بالذات لتكون ملكة النضافة اكيد حزرتو ..... موو لأنو بكل بساطة ايوشة الطبوشة بنتو للمدير اي نعم بنتو يلعن ابو الواسطات اديش بتظلم ناس وبترفع ناس 😭😭😭 راحت عليك ياعمار ياحبالتي ال 3 ساعات سلخ جلد و شلوطة بالحمام وطلع الست ايوشة الطبوشة ع المنصة وحطلا التاج على رأسها ابوها وهو مفتخر ببنتو رغم انو كانت مهملة ووسخة والوسخ يشرشرمن كواعها وكنت انظر نظرة عادية لهاالبنت بس من هاللحظة اكتر انسانة بكرها وهي عدوتي الأبدية طول العمر وضليت طول الدوام مقهور ومحرور بدني حر منها ومن ابوها وما قدرت ركز ع دراستي وما عم يروح من بالي كيف الست ايوشة الطبوشة المنشحة سرقت مني تاج النضافة يلي حسب قناعتي واعتقادي انو هاد من حقي قولا وفعلا ورجعت ع البيت والسم عم ينقط مني ودمي عم يفور وفتت مقهور وزتيت الجنتاية ع الأرض وقلتلا لامي انا معد بدي روح ع المدرسة ... بطلت لو تدبحوني معد روح مديرنا غشاش وبنتو كمان غشاشة وجكر بالنضافة وتاج النضافة وجكر بالمدير و بنتو معد بدي اتحمم لتخلص المدرسة 🤣 و حكيتلا لامي القصة فحاولت تلطف الجو عندي شوي وتبسِّط المسألة يلي كانت عندي شغلة كبيرة وما بتتبسط وطول اليوم ما إلي نفس آكل والعب مع اخواتي وتاني يوم الصبح بالتهديد ... بالترغيب ما قدرو اهلي يخلوني روح ع المدرسة بطلت يعني بطلت وغبت 3 ايام وأنا معند وحاطط ببالي انو معد بدي كمِّل دراستي او شرطي انو ينقلوني أهلي لمدرسة تانية ورغم اصراري وعنادي بس انحلت المشكلة ورجعت داوِّم بالمدرسة بكف واحد من أبي خلاني شوف نجوم الضهر وقلي متل التوتو بدك ترجع ع المدرسة والتوتو بثقافتنا الحمصيىة الكلب الصغير 🐶 الله يعزكم الله يسامحك يا ابي من ملك النضافة غير متوَّج لتوتو صغير ااايه قاسي وغدار يا زمن 😞💔😞 وصرت بالفرصة احبس حالي بالصف ما إلي نفس شوف ايوشة الطبوشة عم تتفتل بالمدرسة وع رأسا تاج النضافة وآخر فرصة نزلوني رفقاتي ع الباحة غصب عني لنلعب سوا ولما خلصت الفرصة طالعين كل الطلاب سوا ع الدرج لما ايوشة طالعة ادامي مع رفقاتا وما بعرف شلون وكيف وسوسلي ابليس اللعين انو مد ايدي من بين الزحمة ومن فوق روس الطلاب واسرق التاج من ع رأسا وخبيتو بتيابي بدون ما ينتبه عليِّ حدا وصارت تولولو ايوشة وتبكي ع التاج وتدور عليه مع رفقاتا بس فص ملح وداب يا إلهي ما اجمل الانتقام وما عرفت كيف خلصت اخر حصة وهوووب ع البيت غيرت تياب المدرسة وليست بيجامتي الجديدة ومشطت شعري وحطيت نص كيس الجيل وبخبخت عطر و وقفت ادام المراية و لبست التاج وصرت اتمتخر بالغرفة وانا رافع راسي لفوق ومآنش تأنيشة ديك 🐓 ويا ارض احفظي ما عليكي وطلعت لعند امي واخواتي وشافوني على هالمنظر اجتون الدهشة انو شلون وكيف صار التاج ع راسي وطبعا كذبت مشان خلص حالي وقلتلون انو وقع من ع رأس ايوشة وما لقيتا بين الزحمة وبكرة برجعلا ياه ولهلأ ما اجا بكرة وما رجعتلا التاج لأيوشة الطبوشة 😁 لأنو هادا حقي ومستحقي وما أُخِذ منك غِشا لا يُسترد الا غِشا 😁 وكبرنا وتنقلنا من صف لصف ودخلت ايوشة معهد متوسط وتخرجت وتوظفت بالواسطة ببلدية حمص مسؤولة قطاع النظافة 🤣 لذلك وبما انو ايوشة الطبوشة مسؤولة النظافة بتمشو بشوارع حمص بتشوفو النضافة والقطافة بأبهى صورة وشي بيرفع الرأس بتتفشكلو فشكلة بالنضافة وعاشت ايوشة الطبوشة وعاشت النضافة المطشوشة والشوارع المرشوشة والحارات المآشوشة بقلم عمار الحمصي