الإنسان منذ الأزل بيحاول يفهم غايته من الحياة التي منحت له، وهدفه اللي بيعيش من أجله، ويربط وجوده بشيء او كيانٍ ما بسبب أسئلته الوجودية الفطرية، ودا بيتجلى بشكل واضح في الأمم السابقة، وشفنا بسببها معتقدات غريبة كما في الحضارة الفرعونية والحضارات القديمة الأخرى، ومن وصل به الحال لاختراع دين وعقيدة خاصة بيه في محاولة لإيجاد تفسير لحياته دي، فتلاقي ناس بتعبد حيوانات أو ظواهر فلكية أو أشخاص حتى، رغم ان لو فكرنا في الموضوع خمساية، مفيش سبب منطقي يخليه يعمل كدا، بيحاول يضيف قيمة لحياته، ويصرف كل ما لديه في سبيل تحقيقها مقابل انه يشعر بالرضا عند الوفاة وانه أنجز حاجة فعلا.

المشكلة انه بسبب اختلاف فكر كل واحد، هتنتج عقائد مختلفة وأفكار متنوعة وآلهة متشتتة، والحقيقة هتبقى نسبية جدا، ملهاش أول من آخر ولا صح من غلط، وهتثير قضايا مختلفة على الصعيد العقائدي والاجتماعي، فممكن شخص يؤمن في معتقده ان الثعبان إله، وآخر شايف انه المرأة أقل قدرًا من الرجل، وآخر مؤمن انه الأرض شايلها فيل، وبسبب نسبية الحقائق بين البشر، وكل واحد يقدر يقول ويرمي أي كلام، كان لا بد من وجود مرجع إلهي أو رسول يأتي بتشريع يصبح مرجع أخلاقي واجتماعي، ويزيح نسبية الحقائق ويجاوب على الأسئلة الوجودية.

بعد ما وجدنا المصدر التشريعي عرفنا انه الإنسان غايته العظمى عبادة الإله، وتتعدد الوسائل لتحقيقها، والمفروض يصرف حياته في سبيل تحقيقها، ودا بيحصل طبعا بعد ما يفضل وقت طويل يحاول يدرك¹​ المفهوم دا، بمعنى ان معرفته بالغاية تتحول لإدراك كامل لكافة جوانبها وتبقى مرجع رئيس قبل أي قرار، والكلام دا مش بيحصل بالساهل، والواحد ممكن يفضل فترة كبيرة من حياته هو بيقلد الناس، بيصلي ويصوم ويقول كلام كما الناس بتفعل -إمعة اختصارًا- عشان ميحسش انه غريب او يتعرض لكراهية من المجتمع²​، بس من جواه مفيش أثر فعلي، مش فاهم هو ليه بيعمل دا ولا الغرض منه، ودا بيخلق حالة من الخواء النفسي والمعرفي، وكل ما يكبر بيبدأ يدرك انه بيقلد وخلاص ومش عايش فعلا، معلوماته -بعيدًا عن صحتها- كلها عبارة عن حشو دون أن تكون لها تأثير حقيقي في تكوين شخصيته أو تكوين معتقد حقيقي عنده، وعلى جانب آخر ممكن شخص تكون معتقداته كلها حاجات إنسانية، ليس لها دلالات دينية بس ملتزم بيها التزام عجيب، وحياته كلها متمحورة حول الفكرة دي، وكمثال لهذا الأمر:

١- حديثًا، ما حدث بعد ٧ أكتوبر، لما ظهرت الحقيقة والعالم بدأ يفهم، في ناس خدت على عاتقها من واجب الإنسانية والحرية، الدفاع والتنديد بالواقع المرير، رغم عدم كونهم مسلمين أو حتى متدينين -في دينهم- لكن فكرهم عن الحرية والإنسانية وشدة إيمانهم بيها دفعهم لتلك الأفعال، نقيضًا لناس تربطهم الديانة والعروبة والجيرة، لم يحركوا ساكن، بل عادوهم.

٢- قديمًا، لما أمر النبي صلى الله عليه وسلم المسلمين بالهجرة للمدينة، لم يكن الأمر مجرد كلام عابر، بل اختبار حقيقي للعقيدة ومدى تأثير الإسلام في نفوسهم، وهل فعلا متبعين الإسلام كدا وخلاص، ولا بقى أسلوب حياة ونمط تفكير. حقيقة الهوان اللي احنا فيه تتمثل في اننا نتبع الإسلام بالوراثة دون الرجوع لأسباب صحة الإسلام أو دراسة تاريخه وكيفية وصوله لينا وعلاقته بالأديان السابقة، وفهم إن الإسلام فكرة حية منذ وجود الخلائق مع اختلاف التشريعات، الإسلام بقى اسم على البطاقة، مجرد حاجة بنذكرها وقت ما يبقى لينا مظلمة وحق، وننساه وقت ما نحب. بقى مجرد فكرة عابرة، مش معتقد ثابث وأصيل بيفضل على البال وببني على اساسه حياتي وطريقة تعاملي، الإسلام أسلوب حياة مش فكرة في الدماغ

١ - الإدراك غير المعرفة، المعرفة هي مجرد العلم بالشيء دون أن يكون ليه تأثير حقيقي عليك، الإدراك له تأثير على قراراتك وحياتك، وبناءًا عليه بتبني حياتك. ٢ - الإنسان بيدور على الـ Social Acceptance عشان يشعر انه جزء من المجتمع ومش غريب عنهم.