Ahmed Ashraf

ممكن تكون شاطر جدًا في شغلك، ومخلص جدًا للي بتعمله، وعندك رغبة حقيقية في النجاح، وبرضه متنجحش. لأن الـ Attitude، والمرونة، والقدرة على التوافق مع الناس والظروف، مش تفاصيل جانبية في معادلة النجاح. دي أحيانًا بتكون الفرق كله. والإخلاص لوحده عمره ما كان ضمانة للنجاح. لازم يبقى فيه رؤية، واستراتيجية، وقدرة على إدارة الخلافات، ومعرفة إمتى تتمسك بموقفك وإمتى تغيّره. وده مش معناه إن اللي بيغيّر موقفه ضعيف، ولا إن اللي بيتمسك بموقفه قوي. القوة الحقيقية إنك تعرف الفرق بين المبدأ اللي مينفعش تتنازل عنه، والطريقة اللي لازم تكون مستعد تغيّرها علشان تنجح. #في_الهامش_مع_احمد_اشرف

● أخطر مرحلة بيوصلها الإنسان مش إنه يغلط، لكن إنه يفقد الإحساس بكونه غلطان، ويبدأ يحاسب الناس إنهم مش متقبلين أذاه!.. الأسوأ من الأذى نفسه هو تبرير الأذى، واختراع أعذار تخلي الجلاد يعيش دور الضحية بامتياز، ويبقى مطلوب من صاحب الحق إنه يعتذر أو يفوّت أو يعدّي الأمور عادي.. في كل أنواع العلاقات، اللي ما يشوفش وجعك منه "غلطة" تستاهل الاعتذار، ما تشوفوش هو نفسه "مكسب" في حياتك يستاهل تكمل عشانه.. الاستمرار مع شخص بيشوف نفسه دايمًا صح هيخلّيه مع الوقت يبقى مرتاح تمامًا وهو بيجرح، وأنت اللي بتعتذر عن إنك بتحس. #في_الهامش_مع_احمد_اشرف

​"لحظات التقدير بتفضل دايمًا هي الأجمل والأقرب للقلب." ​تشرفت بتكريم غالي جدًا من سيدة ملهمة وقامة نعتز ونفخر بالعمل معها، الدكتورة هدى يسى، رئيس اتحاد المستثمرات العرب وممثلة مصر في البريكس وعضو المجلس المصري للشؤون الخارجية ،خلال قمة الاستثمار العربي الإفريقي والتعاون الدولي بالاقصر. ​الكلمات تعجز عن التعبير عن امتناني لدعمها المستمر وثقتها الكبيرة، والنجاح ده ما كان ليكتمل لولا جهود فريق عمل مخلص آمن بالهدف واشتغل بروح واحدة. ​الحمد لله دائمًا، وشكرًا من القلب لكل من ترك أثرًا ودعمًا في هذه الرحلة.»

من حقك تعمل mute لناس كانوا قريبين منك في فترة.. ودلوقتي مابيقتوش شبه بعض من حقك تعمل unfollow لناس اخباركم بتضايق بعض من حقك تحط حدود لناس كانوا في يوم أقرب ناس ودلوقتي بقوا اكتر ناس محتاجين الحدود مكانة الناس مش ثابتة.. مكانة الناس بناء على تشابه قلوبكم وأولوياتكم في الحياة مش لازم يكونوا غلط.. ومش لازم أنت اللي تبقى غلط.. بس الغلط إنك ماتحطش الناس في مكانتهم الصح تصالح إن هيطلع عليك كلام بعدها.. بس أنت اللي كسبان سلام وأمان #في_الهامش_مع_احمد_اشرف

القاعدة تنص على التقبل وليس التحمل؛ فالتقبل يعني أن تعترف بوجود الاختلاف، وتحترم حق الآخر في أن يكون مختلفًا عنك دون أن تحاول تغييره بالقوة. أما التحمل فهو أن تبقى في وضع يؤذيك، وتقنع نفسك أنه عليك تحمله فقط لأنك اعتدت عليه؛ فليس كل ما تستطيع تحمله يجب أن تبقى فيه. 🌿🌹 #في_الهامش_مع_احمد_اشرف