مِش كل لقمة تبقى لقمة عيش
دي اللقمة لو بالذل تبقى حرام
ولا يوم يعِيبك لو هتلبس خيش
ما دام فؤادك مِرتدي الإحرام
وان كان نصيبك ذُل لجل تعيش
مقداره طِن إياك تطاطي جرام!
الدنيا لو فيضان خلّيك في وشه السّد
وبلاش تعَلّي حيطان مِستسلمة للهد
وان يوم صادفت الرّيح إوعاك تطاطيلها
تبّت في أرضك أوي هينقطم حيلها
وإيّاك في يوم تنكسر على أي صاحب غاب
اصبر يا صاحبي تنول بدل الحبيب أحباب
ضفايرها أطول من حبال الصبر في شراع مركبة أيوب
وعيونها أوسع من بيوت الشِّعر لمّا في الخيال بتدوب
وقلبها مزارات توصل لها بعَتبات فوق منّها مكتوب:
يا اهل الملامة حرام دا اللي انكوى بغرام
حتى ان غلب بالشوق عاش في الهوى مغلوب
يا لايم الدنيا عليك وبس اللوم
الدنيا ساقية تلِف ع الفاضي
والخلق واقفة فاتحين لها حفانهم
فاكرينها هتغيّر قانونها علشانهم
راضي بفعالها ولّا مش راضي
الدنيا ألأم خلقه يا فالح
ما تِملا كاسك إلا بالمالح
ومهما تشرب منّها محروم
دا الكل ظالم والجميع مظلوم
وكله عامل عَ الجميع قاضي!
