نوال حسن

صلَّى عليك يا نبي البار والفاجر والمولى وملايكته سبحانه جل عُلاه خضرا القلوب بالصلا ونَدِيّة يا حناجر يا رب صلّ عليه أحمد عظيم الجاه واجعل قلوبنا إليك مِ المعصية تهاجر تِلزم حِمى بيتك ومسجده ومسراه #نوال_حسن

مِش كل لقمة تبقى لقمة عيش دي اللقمة لو بالذل تبقى حرام ولا يوم يعِيبك لو هتلبس خيش ما دام فؤادك مِرتدي الإحرام وان كان نصيبك ذُل لجل تعيش مقداره طِن إياك تطاطي جرام! #نوال_حسن

الدنيا لو فيضان خلّيك في وشه السّد وبلاش تعَلّي حيطان مِستسلمة للهد وان يوم صادفت الرّيح إوعاك تطاطيلها تبّت في أرضك أوي هينقطم حيلها وإيّاك في يوم تنكسر على أي صاحب غاب اصبر يا صاحبي تنول بدل الحبيب أحباب #نوال_حسن

ضفايرها أطول من حبال الصبر في شراع مركبة أيوب وعيونها أوسع من بيوت الشِّعر لمّا في الخيال بتدوب وقلبها مزارات توصل لها بعَتبات فوق منّها مكتوب: يا اهل الملامة حرام دا اللي انكوى بغرام حتى ان غلب بالشوق عاش في الهوى مغلوب #نوال_حسن

يا لايم الدنيا عليك وبس اللوم الدنيا ساقية تلِف ع الفاضي والخلق واقفة فاتحين لها حفانهم فاكرينها هتغيّر قانونها علشانهم راضي بفعالها ولّا مش راضي الدنيا ألأم خلقه يا فالح ما تِملا كاسك إلا بالمالح ومهما تشرب منّها محروم دا الكل ظالم والجميع مظلوم وكله عامل عَ الجميع قاضي! #نوال_حسن

مضمضت حلقي بالحقيقة المرّة وخلعت برقع الحيا ورميته وفؤادي بيعته واشتريت لي لسان مليان كلام من سنين خبّيته - ضربت ناري فـ الصدور الخاينة من غير ما اعمل للنوايا معاينة طول عمري بدّي للحقيقة الباينة قفايا وابلع للحبيب الزلط إزاي زمان كنت باقدر آلاقي مليون مبرر مهما كان الغلط وأقبل أسفهم حتى لو متقالش أنا كنت واحد ماشي جنب الحيط وحبايبي نجحوا يقلبوني لوحش ** سنّيت سناني ونزلت أكْل فـ قلبي ونزعت منُّه الطيبة والحنّيّة وقطعت إيدي اللي كنت ماددها لناس عددها كان معدّي المية ولبست توب الشيطنة ورميت توب البراءة مش بيرضي الدنيا كل اللي شافني قال لي ليه اتغيرت؟! فاختارت اجاوب ع السؤال بعينيا - النظرة أبلغ م الكلام أوقات وأنا عيني شايلة من زمان حكايات فاكر يا صاحبي لما جيت لك ببكي بقيت تزايد ع العياط بعياط خلّيتني فاكر إن حزني قَليِل ودموعي أتفه من اعوز مناديل وجروحي أبسط من اقضّي الليل سهران وجرحي لما أنام هيخف فـ عز حزني سيبتني غرقان وفـ عز حزنك كنت كتف فـ كتف -الشاعر مصطفى محمود Mostafa Mahmoud #mostafa_mahmoud

يا سامع الشكوى والسر والنجوى وبكل حاجة عليم عبدك ضعيف عاجز ولرحمتك عايز ما تحوجوش للئيم! #نوال_حسن

الأوّلة حبّيت والتانية حنّيت والتالتة ما لقِيت والرابعة يا رب الأوّلة حبّيت في بلاد ما حبّتني والتانية حنّيت ويا ريت ويا ريتني والتالتة ما لقيت أحضانها منعتني والرابعة يا رب من حبها غِيتني الأوّلة حبّيت في بلاد ما حبتني واستهزئت بيّا والتانية حنّيت ويا ريت ويا ريتني ما عشقتها هيّا والتالتة ما لقيت أحضانها منعتني ولا كات مواسية والرابعة يا رب من حبها غِيتني أو ردها ليّا الأوّلة حبّيت في بلاد ما حبتني واستهزئت بيّا وضحكِت على نوحي والتانية حنّيت ويا ريت ويا ريتني ما عشقتها هيّا ولا رئِت بوحي والتالتة ما لقيت أحضانها منعتني ولا كات مواسية لقلبي وجروحي والرابعة يا رب من حبها غِيتني أو ردها ليّا تترد لي روحي #نوال_حسن

بتيجي الدنيا وتقرّب ما بافرحشي ولا رمشي ف يوم يتهز لو تمشي سِيان الأمر مش فارق ما يشغلنيش فيا من كنتو نبض الروح صبحتوا مفيش أنا بيكم ومن غيركم لا زلت باعيش فيعني وجودكو من عدمه ما يفرقشي! #نوال_حسن