أخبارك إيه؟!

صاحبي اللي ما بيسألش غير وقت اللزوم صعب إني أصيغ الحزن في بداية كلام والحل إني أسبق سؤالك بالسؤال أو أرد أقول: الحال تمام.. صاحبي اللي ياما سألته عن سر الغياب كان صعب أرد الضيق بضيق.. ف انا هسألك: أخبارك إيه؟! لسه يوماتي أنا بنتعي وبدندن الأحزان في ماضي أنا بمشي فيه بشرب سجايري وأطلع الدخان دواير م الندم واسرح بحالي يوماتي بين ضي وعدم واستنشق الهم التقيل على قلبي واتنفس رتوش.. - الحال تمام.. وسكوتي ده رد لكلام قولته ولسه ماصونتهوش.. عاطل في بيت ماعرفتش أتدارى ف ماضيه ويا دوب بطير بخيالي علشان الجنيه ما املُكش غير ورقة وقلم.. وخيال بيقصر كل يوم - أخبارك إيه؟! أخبار مراتك والعيال؟! عارف ولادك أشقيا.. دايماً مطالبهم كتير.. كبروا يا واد؟! فاكر يا واد أيام ما كنا صغيرين؟! كان حلمنا نكبر ونبقى ف هندسة.. طب فاكر الجوابات وتقليدنا لحليم؟! - آآه يااا حكاااااوي المدرسة.. طب فاكر الشعر اللي كنت أنا بكتبه وتضحك عليه؟! كان يجرى إيه لو موتنا واحنا صغيرين؟! عارف يا صاحبي إن انت مش عايز تموت مش م الهنا.. عايز تربي العيلين وتبل ريقهم بالحكاوي الضيقة وتحارب الزمن اللي يشبه للخيوط قبل أما ينصب للخيال المشنقة.. عايز تكون قدوة لمراتك والعيال وتدوخ عشان تشبِع بطونهم بالحلال.. وتغني ليهم كل يوم في غناوي م الزمن الجميل.. - الحال تمام.. والرد ده أبلغ كلام لسه العشم بيجيب عشم ف هعيد وهحكي لَك كمان.. لف الزمن بيا وخلع ف بقيت باعيد أيام زمان وبقيت بعيد عن كل كلمة بتتحكي الصبر صابني بالغبا ف بقيت بطيء ساكت مابعرفش اشتكي.. «يعقوب» في حيرتي وندمي على فقد اللي ضاع «موسى» في تُقل لساني عن نُطق الكلام «أحمد» بحاول ألبّي قدر المستطاع فـ برد أقول: الحال تمام.. وسكوتي ده رد لكلام قولته ولسه ما صونتهوش.. بشرب سجايري وأطلع الدخان دواير م الندم وأسرح بحالي يوماتي بين ضي وعدم وأستنشق الهَمّ التقيل على قلبي وأتنفس رتوش! صاحبي اللي ما بيسألش غير وقت اللزوم صعب إني أصيغ الحزن في نهاية كلام لسه يوماتي أنا بنتعي وبدندن الأحزان في ماضي أنا بمشي فيه وبحُكم فلسفة الزمن كان صعب أرد الضيق بضيق.. فـ أنا هسألك: أخبارك إيه؟! #أحمد_عدلي

أخبارك إيه؟!

التعليقات (1)

أخبارك إيه؟!

أخبارك إيه؟!

التعليقات (1)