من كام سنة.. كان أبويا بيطوف الحياة علشان يسلمني الطريق كان أبويا روح والجِسم عَمران بالشقا وحياتُه حامِت ع الغيوم من كتر تكتيل الهموم بين يوم ويوم لَحَمِت خيوط العنكبوت علشان تِفَصَّل مشنقة.. من كام سنة.. سلِّمت أمري لحكمتُه كنت الجبان اللي بيتباهى ببراءة في قِوِّتُه.. وفـ مرة عَدّينا الطريق عَدّيت سليم.. بس اللي حَطَّمني ساعتها إن الطريق كان هدفه إنه يموِّتُه.. والدي اللي سلِّمني رايات شغف الحياة علِّمني إزاي أرتجل / أصرخ / أعيش علِّمني حكمة جميلة من كلمة مفيش علِّمني إزاي ابتكر من وحي فَقر الحاجة أم الإختراع.. علمني أحاسب نفسي على كل اللي ضاع من غير صداع.. وازاي أخِف ضلوعي على تُقل الرَّصيف.. علمني أكون عابِر خفيف أزهَد في كل اللي اتبنى وابني الجديد وانسى السواد اللي مضى وانسى الجروح بالفضفضة.. واكتب جديد.. من روح ماسِلمتش لخُطى.. بكتبلُكُم من وحي سِيَر الشقيانين راجل بيرمي همومه على كتف الجَنين وبيمضُغ الروح البريئة ويرتجل مخلوق جديد.. مخلوق شقي.. حامِل لعَرش البيت.. من كام سنة.. أنا كنت بتمنى سؤالي عن الشقا دلوقتى شايف فوق رقبتي المشنقة مرعوب أوي.. حاسس بتأثير عزرائيل ندمان أوي.. ويا ريتني ما اتمنيت.. #أحمد_عدلي
