تفاصيل المنشور

شيلت المرايا لقيتها واقفة وحاجزة بينا

مديت بجسمي خطوة واحدة وخدت إيدك

من يوم ما قابلت روحي روحك وانتي جنة

ولقانا كان قدري ونصيبي إني أبقى عيدك

ولإنك انتي بقيتي سكة آخرها فرحي

بمشي وبلف طريقك انتي بكل طاقتي

رحال في قلبك بكتشف من فين طريقنا

من نور عيونك بهتدي لطريق إرادتي

نظرات عيونك بتناديني وببقى هايم

وببلة الريق العفيفة أنا ببقى عايم

وبكلمة واحدة تطمنيني ألاقيني نايم

وما أشيلش هم الدنيا ولا أعد الهزايم

عايزك تكوني بخير عشان ما أبقاش حزين

الشوق بياكل فيا وانا مش حمل شوقي

وبعوَّض الشوق اللي حيلتي بالحنين

واستنشق الحب في صورنا واقول سنين

واستنى كلمة بسيطة تمحيلي الأنين

وأخفي هموم الدنيا فيا عشان تروقي

فبلاش تدوقي اليأس فيا وحَلّي عيني

خلي عيوني تشوف سمايا بشكل تاني

أوقات من الضلمة بكون ما أعرفش فيني

تايه في قلب الدنيا وببعتر أماني

عَدي السنين جوايا وانا أعِدِّك سنيني

وأعيش حياتي بشكل أحلى من الأغاني

كل اللي حابب أقوله في نهاية قصيدتي

إن الحاجات وياكي بتعدي في ثواني..