تفاصيل المنشور

موقف جميل حدث مع آدم ابني ..حبيت أشاركه معكم لأني رأيت فيه ما هو أبعد من الطرفة.. ذهب آدم وصديقه لصلاة العصر في مسجدنا القريب، الذي من كرم الله علينا يشترك مع بيتي في نفس الحائط وأثناء توجههما إلى المسجد شاهدا عربة كارو يجرها حصان قد أثقل صاحبه عليه ويجبره على السير بالضرب الشديد، فتأثر ابني وصديقه، غير أن الصديق وصل به التأثر إلى ما هو أبعد من اللحظة.. عندما عاد آدم إلي كان يضحك قلت: إيه يابني انت متأكد كنت في المسجد؟ قال: أيوا يا أمي بس حصل حاجة مخلياني مش قادر أبطل ضحك. قلت: خير. فحكى لي ما بدأت معكم به ثم قال: وقفنا نصلي يا أمي ولما سجدنا أنا وصديقي جنب بعض، تخيلي سمعته بيقول في دعاء السجود: يارب كن في عون الحصان يارب ساعد الحصان 🐴ويكررها يا أمي، وأنا سامعه مش عارف أركز في دعاء السجود وكمان خلاني ضحكت من اللي بيقوله. طبعا كمان أنا ضحكت، وبعدها قلت له: يعني مستغرب إنه صديقك عنده شفقة وقلبه رحيم وبيدعو للحصان المسكين؟!😔🐴 قال لأ والله، بس يا أمي دعاء السجود اللي هو أهم دعاء يخلصه كله على الحصان!! ما دعاش لنفسه ولا لأهله بس الحصان.. قلت له: كلامك صح، لكن يمكن بطيبة قلبه ورحمته بالحيوان اللي خلته يكرس له دعاءه ربنا الرحيم الرحمن يستجيب له ما لم يطلبه. مش لازم يا آدم نشوف كل حاجة من زاويتنا إحنا وبس، ربما في معاني إحنا مش شايفينها، وربنا المحيط سبحانه. الموقف صح انتهى، وصح ضحكنا وتناقشنا لكن صدقوني بعدها ترك لي أفكار كلها بتصب في شيء واحد.. ازاي أولادنا بيتفاعلوا مع المواقف المختلفة، وازاي في مرحلة مبكرة نقدر نتعامل ونخرج بهم من الموقف لبر الأمان بغرس المعاني النقية والقيم الصحيحة من خلالها وازاي مانعديش حاجة إلا ونقف عندها ونسمعهم للآااااخر لأن بالتأكيد دا هيكون له أبلغ الأثر.. تحية لصديق آدم الرفيق /اللي إن شاء الله نقدم له حاجة حلوة/ وتحية لآدم اللي عنده وعي بدعاء السجود وأهميته وتحيات لكم إذا قرأتم باهتمام نسيت حاجة مهمة، آدم قرر يطبخ النهاردة🥹، فلو أنا ما ظهرتش في خلال 24 ساعة اتصلوا بالإسعاف🤭😆 @المتابعون