احمد عوض

شادد رحالي ع الامل جواي سامع لصوته كأنه حر وناي حاسس ببكره كأنه شمس وجاي حاسس بحزني كأنه بيولي الفرح جي ولا محاله جي بيغني *** بابدر في بكره تقاوي تمحي الهزايم بخطو بحلمي لبر طالب نور لامح لنبته بتزغرط في أرضي البور وبَحلّيِ ف مُر الليالي لو بالكدب *** لو هاضحك على نفسي واقول إن اللحمه جنب الفول الفرق قُليل مش مسافات وان العالم بني ادمين مش بني أزمات وان الثوره ممكن تنجح بالهتافات وان الجايات اجمل بكتير وان الفايت أهو ذكرى ومات وان ديسمبر مش بس فراق والنقطه السودا ف مشواري او يوم ما بعدتي انا يومها نسيتك ف ثواني *** وان الدنيا دي مهما بتقسى مسيرها تلين وان الحلو هاييجي هاييجي ولو بكمين وان الدنيا بحالها دي جنبي وان مسيري راح اسبق واجري وان الفقر خلاص هايسيبني ويطرح ورد أو نار الفرقه اللي ف قلبي بالوقت هاتهدى وتصبح برد *** واني بأملي انا هاقتل يأسي وهانهي سنين عشتها ف عذاب او حد هايهمس ويفوقني ويفهّمني ان انا كداب

الحق مش هو الحق صدقني لاقيتني خايف ماتجري تلحقني دا انا تايه /تايه بجد تايه معرفش حد لا عرفت طريق ولا شوفت صديق ولا ليا دموع مالعين للخد ف ازاي بالعقل اصعب علي حد؟

ابكي بعيد يا احمد مش وقت صداع وان كنت هتهرب اهرب من غير ماتقول متقولش هموت لو كنت ناويت روح موت علي طول انا عاوز ارتاح مش عارف متقولش جبان قول خايف الكون بالوقت اهو ضاق بيا مخضوض وف قلبي جراح مؤذيه والعالم اصعب من كونه حياه وورود واسهل بكتير من كونه سلاح وبارود العالم! العالم يا احمد مش شايفك تصلح انسان العالم سكري مجنون وجبان ولا سامع لكلامك ولا حاسس بيك العالم fake ف اسمع لكلام عقلك واهرب من غير ماتقول وان قالك موت متقولش لحد وروح موت علي طول

يادي المزاج الهنا لو ارجع لورا كام سنه وساعتها بس يجوز هعرف مين انا واوشوفني واعرفني واحب دنيتي واعشق بلا تلكيك واضحك ساعتها بجد مش ضحكه صفرا وفيك واحلف بإن الجد ساعتها يبقي هزار واطلق ايديا للهوا واجري بلا إنذار ساعتها مش هحسب وساعتها مش لازم واحد زائد واحد حتما يساوي اتنين مفيش حسبه ولا قوانين ساعتها عادي نكون مجانين نضحك للشمس ونقول القمر ملاحقنا منخافش من بكره ولا بعده مفيش افكار مفيش زحمه في فرق ساعتها بين ليل ونهار كان اخر احلامي امتي اكبر وصحابي كمان يبقو كبار كنت احدف نظري لفوق وتدور ف دماغي بدل الفكره اتنين وتلاته يعني اي كدب ويعني شحاته ولي في فقير ولي في غني ولي اتخلقت السرقه وهو ده ربنا ولا دي السما انا عارف جوايا حي ع الصلاه بس اي هي حي علي الفلاح ويعني اي عزله ويعني اي عزيمه ويعني اي هزيمه واي معني الكفاح والقمر ازاي قالولي ف المدرسه عتمه وانا شايفه بينور ولي بحدف سنتي للشمس ولي الناس خايفه من بكره ؟ مع ان في مدرسه وفسحه! ولي احلامهم ضيقه وحوش المدرسه واسع؟ ولي ابويا قالي امتحانات الحياه صعبه؟ طب هو مذاكرهاش؟ كنت احب الرز من الملايكه مع إني لا دوقته ولا شوفتهم لكن من حواديت ستي حسيت بطعمه وساعه ماعرفت ستي طبيعي عرفتهم ندمان اني ف يوم اتمنيت اكبر دلوقت حسيت بقيمه الوقت دلوقت بقي في قوانين وفي حسبه ومفيش فرق مابين ليل ونهار الدنيا بقت زحمه وعقلي اتملي افكار وعرفت الكدب وعرفت يعني اي هزيمه وعرفت معني الكفاح وعرفت معني العزيمه وعرفت ان ربنا ابعد مالسما لكن ف كل مكان سمعت عن الفرح وكلت مالاحزان وللأسف كبرت واصحابي كمان كبرو والزهر ف شبابنا اتحرق وعرفت لي اتخلقت السرقه لما عمري اتسرق

الغلب شاقق جلود الناس ومقطم سنانهم مبقاش في صحه لقرقشه الزلط والصح صعب مفضلهمش غير طريق الغلط في حته بتموت جواهم كل يوم حتي الموته مبقتش واحده زمان لو قلبك شغال بتعيش دلوقتي مش بيعيش غير اللي قلوبهم جاحده دلوقت قلبك لازم يموت عشان تكمل سعي دلوقت قلبك لازم يموت عشان يكمل دق الطيب بقي اخره دمعه ونعي والدنيا اختلفت مبقيتش حتي بتشتغل بالزق صعبه الحياه ومين اختار يعيشها حبيت حياتي الفقر جه ونكشها والموت ف روحي مبطلش يناغشها والحظ اكتر شئ بعيد عني بخاف مالدنيا واخاف مالموت مجتش بالحب مش جايه بالنابوت واللي الليلادي معاكم بكره جوه تابوت بأفئف ف وسط الزحمه وابكي لو ابقي وحيد كل شي ف ايديا قريب بيبقي عني بعيد متغيره الايام والدايره بتضيق عليا زي اوضتي ووقت مابغمض عنيا وزي روحي الطيبه المؤذيه وزي حلمي عمال يطير وانا مربوط وزي عقلي ع ده عقلي مهوش ربوت مبقاش فيه عقل عشان يفكر و زيي انا وحظي مبنتفقش مبنتقابلش وكإننا ف علاقه عكسيه زي الحياه والموت زي الهدوء والصوت كإنك عمال بتحكي ل اعمي عن الحب من نظره زغروطه فرح جنب عالم طرش كلامك عن الحريه ف وسط قاعده برش زي العيد لو جه والجيب مفيهوش مليم عيل صغير بياع مناديل ف وقت ربيع لا طال الصيف فيبيع للعرق ولا طال الشتا فيبيع للبرد محالفهوش الحظ عشان يبيع ف كل الحالات تايه و ف كل الحالات بيضيع