وسم

يوميات لطيفة بنت الأزعر الحلقة(1) كيف أكتب.......؟ البداية - بدي اصير كاتبة. - طيب صيري.. انا ماسكك شي ؟ - بعرفش اكتب حرفين بلغة صح، بدك تعلمني. - طيب هاي موهبة صعب تعليمها، ولو علمتك شو الفايدة.. احنا بنكتب من عشرين سنة ومش لاقيين حد يعبرنا او يطبعلنا، لا اعطونا عضويات فخرية بالجامعات، ولا استضافونا بمؤتمرات، ولا حتى عزمونا على أكلة شاورما مع أشبال الكشافة.. - طيب اسمع.. اعطيني اتلف حاجة انت كتبتها.. اشي انت مستعر منه وما بتتفاخر انك كتبته.. - استني اشوف.. لحظة.. لا مش الحلزونة .. الحلزونة انتحرت زمان.. في قصيدة كتبتها وبصراحة خجلت انشرها..تاخديها.. - سمعني اشوف.. - هذي العيون السود تنضح بالهوى... والحب في عرف الحبيب جمالُ - هاي اللي انت مستعر منها يا متنبي.. لا بديش اياها.. هاي بتدل انك مثقف والجمهور بحبش يقرا للمثقفين .. - طيب انا بقدرش اكتب الا هيك.. شو اعمل يعني.. - يعني ممكن نقول: هاي العيون السود خضرة بغرامك حبيبتي... لولا الملامة يا ناس.. كان اعطيتها كل اللي بجيبتي.. ممكن نقول: عيونك بتغري يا حبيبة.... بس بصراحة.. مش اكتر من الجيبة - الله عليك.. انتي هيك الصحيح حتكسري موازين النقد، والاستاذ الدكتور فلان الفلاني حيكتب عنك دراسة نقدية ويشرح لطلاب الماجستير عن البلاغة والاعجاز في شعر لطيفة بنت الأزعر.. حتى اسمك على وزن شعراء الجاهلية. - استنى لحظة.. انا بعتت البيت عالواتس لاعلامي صديق.. ومش عايزك تغار او تزعل بس لازم امشي لانهم حيستضيفوني في فضائية الفيل الثقافية.. - وبالنسبة للقصيدة بعتيها لحالها ولا مرفقة بصورة شخصية، وانتي حاطة جردل البوية على وجهك ومبينة خط بارليف اللي بحاجة لاقتحام .. مالت لتقول في دلال: طب ما تقتحم يا بطل! رأت نظرة القرف في ملامحي فاستدارت بلا مبالاة وقالت وهي تعطيني ظهرها: - يا باي عالغيرة.. اصلا لولا الغيرة ما حبلوا الرجال.. #ماتدقش #لطيفة_بنت_الأزعر #شعر