وسم

بلف فـ شوارعِك يا مصر بسببها وبافْضَل يوماتي أدوِّر عليها وبادعي فـ صلاتي ما تكتب كتابها ولا دبلة تلمس صوابع ايديها - وصدفة تجمّع ما بينا للحظة وغنوة تشعلق قلوبنا برقصة يا رب انت أعلم بروحي اللي ناقصة - وسر اكتمالها فـ إنّي ألتقيها . مَعُدتِّش بعتِّب أماكن بِعيَنْها أماكن مكنْتِش بروحها إلا بيها وعُمري ما عقلي تخيَّل يمينها هينْزِل على أرض ماشية عليها - وتخلف وعودها اللي حلفت تصونها وتفضل قُصادي بتبني فـ حصونها زمان كنت بافْضَل يوماتي حاضنها - ودلوقتي عاجز أبُص فـ عنيها . حِلفت إني هقدر أكمِّل بدونها واديني باكفّر يميني وباصوم يا رب انت أعلم بروحي، فعُونها وزيح من عليا جميع الهموم - وبطّل يا قلبي تحنّ لكلامها وبطّل تجيبني أزورها فـ منامها وبطّل تلمّح بإنّك ظالمها - وحاول تكمِّل حياتك و قوم #ما_تيسر_من_دموعي #شعر #مصطفى_محمود_إبراهيم

إدّيَت أمان للدّنيا .. والدّنيا طلعت فخ بتبان ريحتها كولونيا .. وترابها متوسّخ خدعتني بورودها والطيبة فـ ردودها ولا نابني غير دودها .. وفـ قلبي سايب شرخ - إدّيَت أمان للبشر .. ردّولي خيري بـ شر آبالسة دول؟ لأ فشر .. أدهى كمان وأشر فحَلِفْت مَلْجأ لهم ولا ضحّي من أجلهم يا رب م احتاج لهم .. واغنيني بيك أكتر #ما_تيسر_من_دموعي #شعر #مصطفى_محمود_إبراهيم

وعدتيني تكوني في إيدي عكازي لقيتك واقفة تنحازي لناس كانت بتكره لي أكون مبسوط وجعتيني كإنك واحدة معرفهاش وبيعتي اللي ما بينّا بلاش يا ألف خسارة على قلبي اللي حبِّك موت - يا كدّابة يا زي الدنيا قلّابة حسبتك جنّة وطلعتي متختلفيش عن الغابة . مسيرنا في يوم هنتجمّع وأبكّيكي وقلمك ده هردُّه اتنين وأخلّيكي تقضّي الباقي من عمرِك بتعتذري على المُر اللي عشته سنين على إيديكي - يا كدّابة يا زي الدنيا قلّابة حسبتك جنّة وطلعتي متختلفيش عن الغابة #ما_تيسر_من_دموعي #مصطفى_محمود_إبراهيم #شعر

مكانش ف الحُسبان .. مكانش متخطط أبان في عينها ملاك .. ونا شخص غاوي أغلط أنا شخص متورّط .. فـ شيطاني مش ذنبي لو كان بإيدي لكنت .. طلّعته من قلبي لكن نصيبي أعيش بشيطان مبيسبنيش كل أما أحاول أتوب التوبة متسعانيش - أنا طبعي صعب صحيح .. ومعترف بصعوبته جوايا قلب مليح .. وشيطاني هو مصيبته لو حل عنّي يجوز هبقى لها عيش وغموز لكن لسوء الحظ أنا شخص مش محظوظ مكتوب عليا أعيش بشيطان مبيسبنيش كل أما أحاول أتوب التوبة متسعانيش #ما_تيسر_من_دموعي #مصطفى_محمود_إبراهيم #شعر