تفاصيل المنشور

الخوف صديقي.. مع إني مبطيقهوش

والضعف شرْحُه.. ملازمني فين ما بروح

البُن كيفي.. والشاي دا معاشرتوش

والصمت طبعي.. ملعون أبوه البوح

.

مدّيَت عينيا لنورها.. صرت كفيف

مدّيَت ايديا لإيدها، بترتها

إزاي ما زالتي فـ نظري حد عفيف

و زاي يا قلبي راضي قسوتها

.

مجروح يا قلبي م الصحاب والأهل

مجبور يا خاطره م الغريب أكتر

منبوح يا صوتي والغنا مش سهل

مضطّر أغنّي حتى لو منظر

.

يا عينيا شايفة الدنيا لسة براح

وحياتي أضيق من مسام الجلد

مبقاش ف جعبة طيري أي جناح

ولا قدمي قادر إنُّه حتى يمد

.

الهم بؤجه.. خدّلت كتفي

خلّاني مطفي شاحب الصورة

لو جيت ف مرة خدت يوم سيلفي

هلقاني بضحك ضحكة مكسورة