تفاصيل المنشور

طلّيتي من بلكونة الصدفة على شارع في قلبي وأنا فاكر كويِّس كان قلبي لابس كسوفه "يشْمَك" وفي ثانية قرر يتخلّي عنُّه ويواجه شجاعتك بمنتهى الشجاعة إزاي يا قلبي توافق تسلَّمنا تسليم أهالي لإنسانة معرفهاش يمكن عشان حاسس بإن النقص اللي فـينا اكتمل من ساعة ما شفناها يجوز بس برضو إزاي تسيب الحبل ع الغارب لجوز عنيها البندقي يبصّوا جواك ويفتشوا عن سر جرحك وعن حاجات قتلاك من غير ما يستأذنوا ازاي تسيبهم -أصلًا- يدّنوا في روحك المالطة ويقلّعوها ملاية الليل اللف من غير ماتحس ويسبوها ع المشاع عريانة للنهار مستسلمة للشمس من غير كام متر ضلمة تستر حزنها بيهم أمرك عجيب واللهِ ولا لاقي ليه تفسير !!! سيبت العنان للبوح ياخد بحدُّه معاك فضفضت عن كل الجروح واسترسلت في العياط كإنك يا قلبي باصص على روحك فـ المرايا وانت بتكلمها مع إن المسافة الواصلة ما بينكم ما بتشبهش غير لحبل أرفع من خصل شعرها #ما_تيسر_من_دموعي #مصطفى_محمود_إبراهيم #شعر