تفاصيل المنشور

وقالو فى الغربه تتعلم كفاح العيشه وتكمل معاها نجاح هناك فى الغربه هتقابل كتير اشكال هيحكولك في كل صباح عن الاحلام وتقديرها عن الأوجاع وتأثيرها في كل كفاح هتحكيلهم ويحكولك سنين الذكرى والايام وموقف عدى قدامك على الذكرى بقالها زمان ‏ هتقعد تحكى بلسانك سنين عشت بتكافح هناك نسيان وتبدأ تسرد الأحداث وبتكمل تقول فى بلادنا بنذاكر هموم الناس وبنكمل تعب مرصوص على الجدران كفاح موصول معاه حرمان وارض جدودنا منهوبه بقالها زمان رضيت بالهم ياصاحبي ومش راضى الهم بهمومي حلفت لسافر ارضنا المنكوبه هعافر يمكن الاقي علة لهمومي أهاجر ‏ سنين القحط فى غيومي ‏ وارض بتشرب العمر ولا بتطرح ولا فيها البشر يفرح ولا فيها الزمان هيعود ولا فيها المجد يعرفلك طريق جُره قلت اسيب الخناق جوه واقلب عيشي من بره قلعت هدومى اغيرها ولبست هدمه عاملها وترزى حبيبى خيطها جديده ولسه شاريها وقلت الهم مش فيها كفايه الغربه عن وطنى كفايه عليا اعديها وكنت حاسبها حسبه تمام اتارى الهم مش باللبس والتحابيش ولا بالوصف فى الايام اتاري مفيش ‏ همومك جو احزانك واسمك هو عنوانك وحظك جو اوهامك مفيش فى الغربه حتى أمان تغادر ارضك الطاهره كما بتقولوا فى السهره جميل الوصف للأوطان هجرتم ليه وسيبتم ارضكم بور سافرتم وانتو فاكرينها هتبني قصور بسرعه يأستم العيشه واول رحله سافرتم وبهمومكم قعدتكم ليله تاجرتم قالوا علينا من الهم بايعنك وبفلوس الغربه شارينك رجعتم تانى تحكوها خيوط بخيال نسجتوها ‏ رسمتم قصه بخيالكم ماسيبنا الدنيا علشانكم شبعتم ولا مافضلشى كام مليون لعيالكم وطنا وانتو ناهبينه وبكل همومنا بايعنه ولو بتقولوا اوطانكم خلاص عارفين كفايه علينا اخباركم خلاص سامعين كفايه علينا احلامكم واحكامكم وإعلامكم خلاص فاهمين كفاية علينا م الاوطان سنين بالهم والحرمان وفقر وجوع مع النسيان كفايه شبعنا من الغربه وهجر الخير من الاوطان كفايه علينا احلامكم واعلامكم وكام صفحه فى الجورنال كفايه علينا من خيركم ‏سنين اليأس والسجَّان ‏ #كرم_محمد_حربي #غربة_الأوطان #شعر #مجتمع #قصيد #عامية_مصرية