الحياة وحشة
كُل أما باحدِف سهم بيجلّي
وأرجع اشيل الهم بالملّي
وارمي بواقي الحلم فـ السكة
واسقي خدودي دمع م المغلي
.
كل أما باخد بالي م الحفرة
بلقى نفسي جوّه دحديرة
كل أما امد ايديا للخضرة
ألقى خضار السكة كان عيرة
حاطط فؤادي صحن ع السُفرة
ياكله قلقي ويأسي والحيرة
-
كل أما باحدف سهم بيجلّي
وأرجع اشيل الهم بالملّي
وارمي بواقي الحلم فـ السكة
واسقي خدودي دمع م المغلي
.
ابتسامتي غايبة من مُدّة
الحياة سرقتها وادّتني
حزن كان لابس هدوم واحدة
بنت سلبت روحي وسابتني
من يوميها مضيت مع الوحدة
عقد ساري لحد م اقتلني
-
كل أما باحدف سهم بيجلّي
وأرجع اشيل الهم بالملّي
وارمي بواقي الحلم فـ السكة
واسقي خدودي دمع م المغلي
.
واحدة حدفت م العدم قشة
قبل م لقى حتفي بدقيقة
قبلها كنت اعرف الرعشة
اللي كات م الخوف وم الضيقة
الحياة ماعرفش ليه وحشة
جاتلي سالمة وسيبتها غريقة
-
كل أما باحدف سهم بيجلّي
وأرجع اشيل الهم بالملّي
وارمي بواقي الحلم فـ السكة
واسقي خدودي دمع م المغلي
.
بطّلت احلم طول ما سعيي ملوش
ضمانات بإني ألقى بر فـ آخره
بطّلت أعلّق نفسي بالمغشوش
ولا ادّي فرصة لحد غيره واذاكره
بطّلت احارب
بطّلت حتى احوش
أنا لسة قلبي متعفاش من كسره
-
كل أما باحدف سهم بيجلّي
وأرجع اشيل الهم بالملّي
وارمي بواقي الحلم فـ السكة
واسقي خدودي دمع م المغلي