الكِتابة
بنكتِب لإن الكتابة ببلاش
لإن الشعور بالندم مايساويش
عناء الوجود والعدم والمفيش
ولَف الهزايم في بَفرَة وشاش !
بنكتِب لإن إللي مات .. مش قريبنا
لإن إللي لهُ حاجة يجي يحاسبنا
لإن القلم والورق من جيوبنا
ودافعين تمنهم مُقدم وكاش !
بنكتِب لإن إللي عاوز يعيش
بأصل المؤهل وصورتين وفيش
هيستنى دورهُ إما يطلَع معاش !
بنكتب لإن إللي عايش يعاني
مافكرش إن السكوت لهُ معاني
وإن اللي مات إنكتب في الأغاني
وإن الأغاني .. كتَبها إللي عاش !
بنكتب لإن الإيدين في الحديد
لإن العلم والسلام والنشيد
وسفك الدماء والدموع والعديد
ما طيبش خاطر لأُم الشهيد
ورجعها تفرح بمترين قُماش !
بنكتب لإن إللي شايفاه عنينا
مايرضيش ضميرنا .. ولكن رضينا
بنحلم بإيد مرة تمسِك إيدينا
ونترَجى أبواب تخبط علينا
ونفتَح نلاقي إللي خَبَط .. ماجاش !
بنكتِب لإن العساكر بريئة
من الدم ممكن/ يجوز م الطريقة
بنكدِب لإن الجروح في الحقيقة
خيوط المشانق ما بتلِمهاش !
بنكتب لإن الشموس .. أو ضحاها
هتطلع علينا في حياتنا وقضاها
ضِحكنا كإن الدقايق/ معاها ..
بكينا كإن السنين .. مامعهاش !
الجميل جداً والمبدع دائماً محمد مرعي
