تفاصيل المنشور

-يا دنيا إمتى لمّا أنْدهلِك

متطنشيش صوتي اللـ راح فـ الندا

طب نوّليني رشفة من شهدِك

والمُر يبعد عنّي لو يوم كدا

.

أنا نفسي أروح فـ النوم بدون م أبكي

أنا نفسي ألاقي حد لي أشكي

يارب حننّ قلبها حبَّة

يا دنيا ليَه مستكترة ضحكي

-

يا دنيا إمتى تحل عن روحي

من غير م نابك يتغرس فيها

يا دنيا امتى تبطّلي تفوحي

بسمومك الغاوية تبخّيها

.

علشان تعكّر صفو براءتنا

والخير مكانه يحل 100 فتنة

يا دنيا مهما العُمر طال بيكي

هتكون نهايتك زي أخرتنا

ـــــــ

*نفَّض همومك من علـ كتافك

وإفرد دراعك فـ الطل يبقى جناح

اجعل كمان الدنيا دي تخافك

حاول تخلّي الضيقة تبقى براح

.

علشان تخلّي الحلم يتحقق

لازم يكونلك فـ الحياة مبدأ

مهما يحاولوا يضعفوك قاصدين

كبّر وكمِّل، وانت تتصدق

-

مين اللي قال الدنيا دي سهلة

الدنيا عايزة تقسمك نصّين

صعب تلاقيها مدّياك مُهلة

ممكن تموت وتفارق العايشين

.

فياريت نخلّي بالنا من روحنا

ونشيل مناب من يومنا لطموحنا

علشان فـ يوم مـ نموت نموت على طول

من غير شعور بالقهرة يدبحنا