30 سنة
30 سنة
ولّا 30 هزيمة
مش باقي حتّة
فـ القلب لسّة سليمة
30 سنة
عمّال بمثِّل إنّي
عايش لكنّي
ميِّت في نظر السيما
--
الدنيا دايمًا تيجي ع للي إتأذى
وللي بيإذوا واخدة الحياة صفهم
أنا قلبي ميّت بس ناقصُه العزا
قتلوني ناس ماعرفش إيه وصفهم
--
خدتيني خايف
سيبتيني ليه مرعوب؟
خدتيني شايف
سيبتيني ليه معصوب؟
خدتيني ليه
لما انتي ناوية تسيبي؟
العيب عليكي
ولّا النصيب معيوب؟
--
مكتوب عليا العياط من يوم دخولي المهد
ودموعي زي البحور ماشفتش غير المد
وقت الهزار الناس حوليا كانوا كتير
ماعرفش ليه اختفوا وقت أما قلبت جد
--
أحلامي كانت زمان واخدة السما سقفها
والدنيا فضلِت تحمِّل اليأس فوق كتفها
من تحت إيد الرحا ماعرفتش إني ألحقها
م اللحظة دي الأمل من كل شيء اختفى
@المتابعون
4