تفاصيل المنشور

*أكمل الفراغات وقولّي

أكمل الفراغات

*الحياة .....

-طاولة يا خِلّي وكلها رهانات

*والبشر .....

-أبيض واسود زي أي قُشاط

*واللسان .....

إنسان وكان فـ الأساس رِطاط

*والكلام .....

-مسّخ وبوّخ دغدغوا الميكات

*والعقول .....

-م اليأس شايلة بؤجتين إحباط

*والجيوب .....

مش شايلة حاجة غير ديون واقساط

*والعيون .....

-مكتوب عليها تتكسي بعياط

*والقلوب .....

-م الهجر قايد فيها ألف شياط

*والصدور .....

-مرشوقة فيها خزنتين مطاط

*والنهار .....

مبقاش بيطلع بالسواد متحاط

*والحقيقة .....

واضحة جدًا وفّر الإسقاط

--

*والجروح .....

-محتاجة ترزي يبقى ليِه فـ الرف

*والوضوح .....

-مبقاش بينفع دنيا عاوزة اللف

*والسهام .....

-محتاجة واسطة مش بكُتر الحدف

*والعزيمة والجسارة .....

-ممنوعين م الصرف

*والشوارع حارة حارة .....

-غرقانين م النزف

*والهزيمة .....

-مكتوبالنا مهما كان الظرف

*والقهاوي .....

-استراحة للي مل اللف

*واللي ساب الدنيا ديا .....

-يستاهل يتزف

*واللي لسة فيها عايش .....

-يستحق العطف

--

*والمخدّة ..

-شاربة دمع خبّينها ورا ضحكة عيرة

*والسجاير ..

-عارفة إن صدورنا شايلة هموم كتيرة

*والقلق ..

-لينا عنده تار يا عالم امتى ناخده

*والأمل ..

-شاب وإيده -ليل وصبح- ملازمة خدّه

*والنواصي ..

-شايلة م الحكايات حاجات تملى القفف

*والمفارِق ..

-فاردة إيدها للسما "لله صدف"

*والليالي ..

-قادرة تسرق م الحياة لحظة صفا

*والغناوي ..

-غاوية تحيي ذكريات حزن وجفا

*والونس ..

-فيه قلوب ماتت من غير م تدوقه مرة

-والقدر ..

ناس بترضى بيه وناس شايفاه مؤامرة