لا مَدّ رجله فـ معركه
ولا مره كتفُه شال كوفيّه...
أشجَع من العالم بحاله ساعات..
أجبَن من العالم ساعات...
وحالات.. يكون راضي بقيوده
وتانيه.. يبقى «چيڤارا» فـ الحريه!
بس النهارده الصبح قرر
يرمي للعالم تحيه:
النهارده الصبح قرر يحدف الطوبه فـ إزاز الدنيا
يكسَر كِبرَها..
يلوي رْقَبِـتها عشان تبُص بعين رحيمه شويه
ع الناس اللي كاتباهم على الهامش
أسامي (بدون أهميه...)
.
_خالد سليم
#شعر#مجتمع#خالد_سليم
ممكن وانا لسه مكاني..
قصاد التلفزيون
باكُل ترمس وسوداني
أكون حاسس..
إن فيه ناس.. في أماكن تانيه من العالم بتعاني..
أكون عارف..
آخر ما توصّل ليه الوضع الأفغاني
وأحوال المعتقلين ف سجـ.ون الصين..
والانتفاضات «اليوميه» اللي بتحصل ف فلسطين..
وأشرح لك ثورات تونس وانقلاباتها..
وأوصف لك أحزان لبنان وانفجاراتها..
والنار فـ غابات المغرب عامله ازاي..
مش شرط تكون جوّه الأحداث
علشان يتقال حاسس بالناس
مش شرط..
مش شرط تطولَك شَظْيَه ف حرب
أو يلمس جسمك ضرب
مش شرط تعاني..
لكن يِكفي
إن الواحد مِنّا يكون حاسس بالتاني
يكون فاكرُه فـ دَعاويه وصَلاتُه..
ويراعي هزيمة اخوه الإنسان - فـ انتصاراته -
ويفرح على قدّه..
مش شرط تغرّق نفسك لَجل تنَجّى اللي بيغرق..
يِكفيك إنك بس تمِد إيديك وتشدّه
كلمة «معلش».. كفايه
- لا هْيْ بتقدم.. ولا بتأخّر -
لكن.. يِكفي انها بتحسسني ان انت معايا
وإنك.. يا بعيد عني بلاد وبحور
مش ناسي أخوك المظلوم المقهور
وبتتألّم علشانُه..
مش شرط تكون جوّه الأحداث
علشان يتقال: حاسس بالناس
لكن يكفي
إنك لو شوفت حزين
تواسْيه فـ أحزانه
.
تضامُن
أغسطس ٢٠٢١
#خالد_سليم
وإن جيت للحق..؟
بكيت امبارح وانا شايف ذُل الإنسان
لما لقيت نص الشعب بيفطر في «موايد الرحمن»
طوابير مخرومْة الجيب، مكسورْة الراس في هوان..
بصيت للسما وحمدتُه.. وقولت: اعفيني
قبل ما تحوجني لحد يارب على الدنيا ما تبقيني
ومشيت والدمعه فـ عيني
وسَرَى من قلبي لـ إيدي لـ كيس الأكل.. الأحزان
.
#خالد_سليم
