تفاصيل المنشور

الكثير من الأصدقاء والمعارف بيلحّوا علينا بأن نجعل (مجتمع) عبارة عن سوشيال ميديا مفتوحة على مصراعيها، ومساحة حرة مثل باقي المنصات، يعني شغل ترندات وهيافة ورقص واستعراضات ووو… إلخ! 💃📱 وبهذا ننتشر بصورة أكبر وأوسع، ونحقق رواج بشكل ضخم ومستفز، ونوصل لملايين المستخدمين خلال فترة قصيرة! 🚀 بتتفكر بالموضوع بتقول وااو الموضوع مغري 😎🤪 صحيح، مغري … ولكن! 😬✋ مجتمع من البداية لم يُطرح ليكون مساحة للتنافس مع وسائل التواصل العقيمة والفاسدة نوعيًا، لما تحمله من أجندات وأفكار هادمة للأسرة والطفل والمجتمع! ولم تُطرح الفكرة لتكون ربحية من الأساس، لنجد أنفسنا بنركض خلف ملايين المستخدمين وملايين الدولارات، ما بين أرباح واستثمارات! 💰 (نعم، من الطبيعي أي مشروع يكون ربحي، أو على الأقل يغطي احتياجاته ومصاريفه الشهرية، لأنه بالنهاية ما في مشروع بعيش على الهواء والماء! 😁) لكن هناك فرق شاسع بين أن يكون المال وسيلة لاستمرار الفكرة، وأن تصبح الفكرة وسيلة لجني المال على حساب مبادئها! ⚖️ 📚 طيب، شو هو مجتمع بالأساس؟ بما أن الفكرة اليوم نضجت، بعدما بدأنا بشريحة متخصصة وواعية، وبنية صلبة من المثقفين وأصحاب المعرفة، وفتحناها للتوسع لكافة شرائح المجتمع، لتصبح بالأساس منصة اجتماعية معرفية وثقافية من الدرجة الأولى. ما أردت إيصاله هنا، بأنه مجتمع مش منبر للشعر، ولا ستيج واقف عليه كم شاعر بيقرأ قصيدة، والجمهور بصفق له وبقول: الله! الله! 👏😂 مثل ما بفكر البعض! نعم، للغة العربية وللأدب والشعر اهتمام خاص، وهذا الجانب بنطوره بشكل دائم، وسيظل جزءًا أصيلًا من هوية مجتمع، لكنه مش كل الهوية! لأنه ببساطة، المعرفة مش محصورة بقصيدة، ولا الثقافة محصورة بشاعر، ولا الإبداع محصور بفئة واحدة! محتاجين بأنه الطبيب يكتب من علمه وتجاربه 👨‍⚕️، والمحامي من خبرته ⚖️، والمهندس من تخصصه 👷، والمعلم من معرفته 👨‍🏫، والباحث من أبحاثه 🔬، ورائد الأعمال من تجاربه 🚀، والطالب من أفكاره، وكل إنسان عنده معرفة أو تجربة أو سؤال أو حتى وجهة نظر تستحق النقاش. يعني مش معقول يكون عندنا طبيب أو مهندس أو محامي، وعنده من العلم والتجارب ما يكفي لكتابة مئات المواضيع، وبالآخر يحصر حاله بأبيات شعرية جميلة! 😁🌹 لازم مجتمع ما يكتفي فيه الإنسان باستهلاك المحتوى، بل يساهم بصناعته وإثرائه! محتاجين مساحة تخليك تطلع منها بفكرة جديدة، أو معلومة، أو تجربة، أو حتى سؤال ما كان يخطر على بالك! وبالمناسبة… هذه الشريحة الأدبية فئة صغيرة ومتخصصة، وبعضهم بتفنن كيف يجادلك، وكيف بدك تقنعه ينضم، وبينظر لك و كأنك لا شيء! طبعًا، لأنك عربي جاهل بتنتمي للعالم الثالث، ومهما فعلت ومهما حاولت، مستحيل تنافس الكبار! 😏 يا صديقي… المعرفة مش محصورة بالعقول الغربية! 🌍 وإن توفرلهم الدعم بشكل ثماني الأبعاد، من تمويل واستثمارات وحاضنات وإمكانات وتقنيات، فهذا لا يعني إن العقل العربي أقل قدرة على الابتكار والإبداع! العقل البشري لم يُصنّف بدرجات لنكون إحنا في أسفل سافلين، ولم يتم توزيع الذكاء والإبداع حسب الجنسية أو الجغرافيا! نعم، عندنا عقل! 🧠 وعندنا شغف! ❤️ وأيضاً عندنا طموح! 🚀 وعندنا صبر غير محدود، وتحمل، وبرودة أعصاب، وحاسة سادسة كمان! 😁 حاسة بنشوف من خلفها النجاح اللي بنرسم ظلاله بقلم رصاص، لنكمل اللوحة ونلوّنها سوا! 🎨✏️ مش مطلوب منّا بأن نصير نسخة عن غيرنا عشان نثبت إننا قادرين ننجح! ومش ضروري نكون من وادي السيليكون، ولا يكون ورانا مستثمر بملايين الدولارات، عشان نسمح لحالنا نحلم ونبني وننافس! إحنا مش أقل من حدا، ولا مطلوب منّا نثبت هالشي لحدا! النجاح مش حكر على جغرافيا معينة، ولا المعرفة إلها جنسية! 💛 📱 نرجع لموضوعنا… ما بتحب تنضم لمجتمع لأنه ما بيدغدغ عواطفك ومشاعرك برقصة، ولا بترند شو جنس المولود، ولا بفيديو واحد بيأكل 70 سندويشة خلال دقيقتين؟ 😂🍔 عادي جدًا! وهذا ما يمكن وصفه بنمط الاستهلاك القهري للمحتوى (Compulsive Content Consumption)، لما يصير الواحد مدمن على متابعة الترندات والمحتوى القصير بشكل آلي، وبدون تفكير، ويقضي ساعات وهو بمرر بإصبعه من فيديو لفيديو، وبالآخر مش عارف شو استفاد ولا وين راح وقته! وطبعًا، مش كل واحد بحضر ريلز أو ترند صار مستهلك قهري، ومش إحنا ضد الترفيه والضحك والتسلية! لكن في فرق بين إنك ترفّه عن حالك، وبين إنك تصير أسير لمحتوى ما إله أول ولا آخر! وفي فرق بين منصة بتحترم عقل الإنسان، ومنصة بتتعامل مع انتباهه كأنه سلعة معروضة للبيع! ⚖️ ما بتقدر تترك هذا المستنقع الرقمي؟ خليك هناك يا صديقي، عادي جدًا! 😁 بس ما تقعد تقنعني وتنقّ عليّ وتعمل فيها إنك حريص عليّ وعلى الفكرة! لأنه لو بدي أعمل نسخة من تيك توك أو إنستغرام أو فيسبوك، شو الجديد اللي قدمته؟ وشو الفكرة اللي استاهلت كل هالتعب من الأساس؟! مش كل انتشار نجاح، ومش كل مليون مستخدم إنجاز، ومش كل مشروع بجيب ملايين الدولارات مشروع بستاهل نفتخر فيه! 💎 💰 أما بخصوص الأرباح والملايين… أنا مش ضد الربح، ولا ضد الاستثمار، ولا ضد إنه مجتمع يصير منصة عليها ملايين المستخدمين! بالعكس، هذا طموح مشروع، ومن حقنا نسعاله! لكن مش على حساب الفكرة اللي انطلقنا منها، ومش على حساب المبادئ اللي من أجلها بنينا مجتمع! لأنه ببساطة، في فرق بين إنك تبني منصة ناجحة، وبين إنك تبيع روح المنصة عشان تنجح! وإذا كان الطريق للمليون مستخدم هو إننا نتخلى عن كل شيء آمنا فيه، ونصير نسخة عن المنصات اللي بننتقدها اليوم، فشو استفدنا؟! 🔥 وهون بوصل للنقطة الأهم… الله والغِنى! 😁 مجرد ما أستشعر إن الشيطان، إن كان من الجن أو من البشر 😈، بلّش يغريني بالأرقام والملايين، ويحكيلي: يلا يا رجل، افتحها عالبحري، وخلي الناس ترقص وتعمل ترندات، والمهم نجيب مستخدمين وفلوس! راح أقول كلمة واحدة: خلااااااص! 🛑💥 وهي كلمة مأتمتة للتدمير الذاتي لكل المشروع! مش لأني مش عاوز له النجاح، بالعكس! لكن لأني ما بدي ييجي يوم أكتشف فيه بأنه هدمنا الفكرة بإيدينا، وخرجنا عن أصلها، ولقينا حالنا بنفس موضع النقد اللي بنحكي عنه اليوم عن المنصات الأخرى! فما قيمة أن ننجح في بناء منصة ضخمة، إذا خسرنا في الطريق السبب الذي دفعنا إلى بنائها؟ وشو قيمة ملايين المستخدمين إذا صرنا نقدملهم نفس الشيء اللي كنا بدنا نصنع بديلًا عنه؟! يعني بنينا منصة عشان نكون مختلفين، وبالآخر صرنا نسخة عنهم، ويمكن أسوأ كمان؟! لا يا صديقي، مش هيك بتكون الأمور! 🌿 مجتمع مش مشروع للكمال… ولا بندّعي إننا بنملك الحقيقة المطلقة، ولا إننا أفضل من غيرنا! راح نغلط، ونتعلم، ونطوّر، ونغيّر الكثير من التفاصيل، ونسمع للنقد والنصيحة، لكن لازم البوصلة تظل ثابتة! مجتمع قابل للتطوير والتغيير والتوسع، لكن مش قابل للتنازل عن هويته مقابل شوية أرقام على شاشة! وبنفس الوقت، مش معناته إنه مجتمع لازم يكون منصة جامدة، ولا إنه كل واحد يدخل يلبس بدلة ويحمل كتاب ويقعد يتفلسف علينا! 😂 لا طبعًا! بدنا الضحك، وبدنا الترفيه، وبدنا القصص والتجارب والحوارات والنقاشات، وبدنا كل شرائح المجتمع تكون موجودة! لكن ضمن مساحة بتحترم عقل الإنسان، وما بتتعامل معه كأنه مجرد رقم أو مستهلك للإعلانات والترندات! بدنا منصة تحترم عقل الإنسان قبل ما تطارد انتباهه، وتعطيه قيمة قبل ما تطلب منه وقته. 💛 وبدنا نثبت إن المحتوى الثقافي والمعرفي والاجتماعي ممكن يكون ممتع، ومتجدد، وجاذب للملايين كمان، بدون ما يخسر روحه وهويته! لأنه مش شرط عشان تكون منصة ناجحة، تكون تافهة! ومش شرط عشان تكون ثقافية، تكون مملة! ومش شرط عشان تنافس الكبار، تتخلى عن نفسك وتصير نسخة منهم! 🚀 عموماً… الكلام يطول ويستمر، وممكن نحكي فيه لساعات! واللي كتبته مش بيان رسمي، ولا درس بالأخلاق، ولا محاولة لإقناع حدا… هي مجرد فضفضة… ✍️ للمحبين والكارهين، للمتفائلين والمتشائمين، للمؤمنين بالفكرة والمشككين فيها، للي مشي معنا من البداية، وللي راح ييجي يوم ويشاركنا الطريق… لي ولكم… وإن كتب الله لنا النجاح، فليكن نجاحًا يشبهنا، مش نجاحًا يجعلنا غرباء عن أنفسنا! وتحياتي ✨💛 #مجتمع #يوميات